Endamê Hêzên Ewlekariya Hundirîn- Beşê Têkoşîna li dijî Madeyên Hişbirê Muemer Dendeh îro bi merasîmekê li Pakrewangeha Şehîd Dilşêr ya gundê Dugur hat oxirkirin. Nûnerên Hêzên Ewlekariya Hundirîn a Kantona Cizîrê, saziyên civaka sivîl, partiyên siyasî û bi dehan şêniyên bajar û gundewarê Tirbespiyê beşdarî merasîmê bûn.
Merasîma cenaze bi deqeyek rêzgirin dest pê kir, paşê bi navê Meclisa Malbatên Şehîdan a Tirbespiyê Selma Xelîl axivî û diyar kir ku ew bi saya ramanên Rêber Abdullah Ocalan û keda şehîdan bi aramî dijîn.
Selma Xelîl anî ziman ku bi sedan mirovên mîna şehîd Muemer li hemberî hêza terorê ya çeteyên DAIŞ`ê ya ku her kes ji wan ditisiyan şer kirin û şehîd bûn û wiha domand: “QSD, Asayîş û tevahî hêzên parastinê li ber terora DAIŞ’ê girtin û bi saya ked û têkoşîna wan em bi aramî dijîn.”
Ji rêveberên Hêzên Ewlekariya Hundirîn ên kantona Cizîrê, Meen Asî axivî û bi van gotinan behsa şehîd Muemer kir: “Şehîd Muemer sembola rihê hevaltiyê bû. Me her tim ji şehîd Muemer hêz û moral digirt. Şehadeta hevalê me ne ya dawiyê ye lê destpêke nû ye. Em soz didin tevahî gelê xwe ku li ser rêya şehîdan hêza xwe ya berxwedanê xurtir bikin.”
Ji rêveberên Hêzên Têkoşîna li dijî Madeyên Hişbirê yên kantona Cizîrê Lewend Mihemed anî ziman ku ew bi şehadeta hevrêyê xwe serbilind in û got: “Em ji her kesî re dibêjin, bi her şehadetekê re em asta têkoşîna xwe mezintir dikin, taybet li dijî kesên dixwazin madeyên hişbirê di nav gelê me belav bikin. Em soz didin şehîdan û gelê xwe ku em ê destkeftiyên bi saya keda şehîdan hatin bidestxistin, biparêzin.”
Li ser navê malbata şehîd Muemer, Ferhan Dendeh jî anî ziman ku bi şehadeta kurê xwe serbilind in û got: “Em hemû yek in. Tu cudahî di navbera Kurd, Ereb, Suryan de nîn in. kombûna ya li vir piştrast dike ku em hemû yek in.”
Di dawî de wesîqeya şehîd hate xwendin û radestî malbatê hate kirin. Paşê hevreyên şehîd cenaze hilgirtin û bi dirûşman spart axê.
Muemer Dendeh êvara roja Sêşemê 2’ê Kanûnê îsal (2025) di encama qezayeke trafîkê de li ser rêya bajarê Til Koçerê şehîd bû.
