Fermandariya Giştî ya Hêzên Sûriyeya Demokratîk (QSD) bi boneya salvegera yekemîn a hilweşîna rejîma Baasê daxuyaniyek weşand. Daxuyanî wiha ye:
“Bi boneya salvegera yekemîn a hilweşîna rejîma Baasê em tevahî gelê Sûriyeyê, bi taybetî gelê me yê Bakur û Rojhilatê Sûriyeyê pîroz dikin. Vê rejîmê welat kişand nav karesatê, bi dehên salan zordarî û şêwazên herî hovane yên tundiyê li dijî Sûriyeyiyan pêk dianîn.
Herêmên Bakur û Rojhilatê Sûriyeyê ji serhildana 12’ê Adara 2004’an ve kontrola ewlehî û leşkerî ya rejîmê şikand. Di sala 2012’an de jî gelê herêmê saziyên tepeserker ên rejîmê hilweşandin û rêveberiyeke sivîl a demokratîk û modeleke bêhempa ji bo rêxistina civakî û dabînkirina xizmetguzariyê ava kir. Di heman demê de, hêzên parastina gel ava kirin ku paşê veguherin Hêzên Sûriyeya Demokratîk (QSD). QSD’ê ku di şerên rizgarî û parastinê de bi hezaran şehîd dan bûn, hêza herî bibandor û profesyonel di şerê li dijî terorê de.
Tiştê ku hatiye bidestxistin ne ji nişka ve bû, lê berhema rewatiyê ye ku ji gel, ji berxwedan û sekn û ji berdêlên ku keç û xortên herêmê ye ku projeya DAIŞ’ê têk birin û li şûna tevahiya cîhanê deverên berfireh ên Sûriyeyê rizgar kirin. Ev rewatiya ku bi xwînê û bi parastina gel hatiye çêkirin, ew e ku hêzên me di warê parastina ewlehî û aramiyê de dike xwedî cih, rol û berpirsyarî.
Qewitandina rejîma Baasê ji herêmên Bakur û Rojhilatê Sûriyeyê di salên pêşîn ên şoreşê de derbeyek stratejîk bû ku bandora wê şikand û pergala wê ya ewlehiyê ji jêderên herî girîn bêpar kir, her wiha hêza wê ya domandina sûcan lawaz kir. Hilweşîna rejîmê bûyerek siyasî ya jê rêzê nîn e, lê belê rûxandina feraseta wê bikaranîna desthilatê û paşguhkirina îradeya gel bû. Jinûve hilbirandina vê ferasetê tê ateya vegera heman trajedyayê ku gelên wê berdêlên wê yên giran dane.
Gelê Sûriyeyê ji ber ji hegemoniya Partiya Baasê bi dehên salan berdêlên giran dane. Partiya Baasê dewlet veguherandibû dezgeheke çewsîner û sûc li dijî Sûriyeyan, bi taybetî li dijî gelên Bakur û Rojhilatê Sûriyeyê siyasetên dûrxistin, birçîkirin, koçberkirina sîstematîk, guhertina demografîk dimeşandin û civakên herêmê ji mafên wê yên herî biçûk bêpar hişt. Serdema tarî divê heta hetayî were tewandin.
Di demekê de ku Sûriyeyî bi avakirina siberojeke nû ve mijul e, hîna jî zimanên provokatîk û kîndariyê dewam dikin ku hin aliyên desthilatê û yên nêzîk wê bi kar tînin û hewl didin heman xîtaba parçebûnê vegerînin. Evanan, hîna jî bi hişmendiya kêliyê difikirin, bi cidiyet siberoja Sûriyeyê û guhertinên heyî naxwînin. Lê bi israr in ku heman rêbazên ku bûn sedema rûxandina welat û gelê wê ber bi karasetekê ve bir bimeşînin. Ev xîtab êdî nayê qebûlkirin û wê nebe bingeha avakirina welatekî nû, lê belê berdewama rasterast a zihniyeta rejîma ketî û ya vengare ye.
Hilweşîna rejîma ji bo tevahî Sûriyeyan derfeteke dîrokî ye ku welatê xwe ji nû ve li ser bingehên nû ava bikin. Ji vir em teqez dikin ku pêdiviya pêvajoya bê bi diyalogên nîştimanî yên rasteqîn û giştî û dûrî dûrxistinê, avakirina peymaneke civakî heye ku mafên azad û wekheviyê mîsoger bikin û rê bi temamî li ber vegera zordarî û despotîzmê bigire.
Tevî ku rejîm hilweşiyaye jî, lê bi sed hezaran koçberên Efrîn, Girê Spî û Serêkaniyê ji mafên vegera li malên xwe mehrûm in. Ev doz dê armanca me ya nîştimanî ya pêşîn be. Eger vegera ewle û birûmet mîsoger nebe, tu çareseriyên siyasî dê adilane û giştî nebin.
Di vê kêliya hestiyar de, QSD’ê piştrast dike ku dê wek hêza bingehîn a parastina gelê xwe bimîne. Wê li hemberî êriş an gefên li ser ewlehiya herêmên Bakur û Rojhilatê Sûriyeyê bisekine. Şervanên me bi rihê xwe ala azadiyê hilda û di rêya parastina rûmeta mirovan de berdêlên giranbuha dan. Em mîrat, meş û berpirsyariya xwe ya parastina ax û gelê xwe û destkeftiyên salên dirêj ên berxwedanê digirin.
Siberoja Sûriyeyê îro dest pê dike, bi derbaskirina hemû amûr û rêbazên feraseta pergala kevn û avakirina Sûriyeyeke nû li ser bingehên azadî, edalet û tevkariyê, dewleta ku layîqî fedakariyên şehîdan û sekna bi milyonan be, destpê dike.”
