Li ber Baxê Giştî yê Parêzgeha Helebce Hevpeyana Jinan a Kurdistanê di çarçoveya Pêngava 16 Rojên Pêşîgirtina li Tundiya li ser Jinan çalakiyek kirin.
Di çalakiyê de Layen Kuwêstan daxuyaniya Hevpaymana Jinan a Kurdistanê xwend.
Di daxuyaniyê de hate diyarkirin ku tundiyê bingeha civakê xira kiriye û ev hate gotin: “Pêşîgirtina tundiyê tenê karê aliyekê nîne. Bê navber qetilkirina jinan ya li Kurdistanê bandoreke mezin li ser ewlehiya civakê kiriye. Divê hemû hewldan bê kirin ku pêşiya vê yekê bêgirtin. Veşartina daneyên qetilkirina jinan û tundiyê xizmeta jinan nake.”
Di dewama daxuyaniyê de hate diyarkirin ku divê bilez hikûmeta nû bê avakirin û parlemento aktîf bibe û ev hate gotin: “Piştî aktîfbûna parlementoyê bi lezgîn kar li ser yasayên taybet yên li ser civakê û jinan bê kirin. Divê hikûmeta nû yeksan be ji bo tevlîbûna jinan ya di nava kar û xebatan de.”
Herî dawî di daxuyaniyê de hate destnîşankirin ku divê gotinên reşkirin û hedefkirina jinan neyê kirin, rêz li jinan bê girtin û ev hate gotin: “Tundiya elektironîkî ya li ser jinan zêdetir bûye, pêwîste wezaret û aliyên têkildar pêşiya vê bigirin û tedbîrên pêwîst bigirin ber.”
