Desthilata Tirk piştî hewldana darbeya 15’ê Tîrmeha 2016’an bi hinceta ku wê girtiyên ji darbeyê tên darizandin lê bên girtin girtîgehên ewlehiya bilind ên ku di nava raya giştî de wekî tîpa bîrê têne zanîn hatin avakirin. Niha ev girtîgeh bûne cihê ku girtiyên siyasî lê tên cezakirin.
Girtiyên siyasî di bin şertên tecrîda giran û zextan de li tîpên bîrê tên girtin. Girtî li dijî tîpên bîrê di greva birçîbûnê de ne. Herî dawî de du girtiyên siyasî ragihandin ku wan dest bi greva birçîbûnê ya bêdem kirine.
Girtiyên siyasî Fergîl Firat û Celal Punar ên ku li Girtîgeha Ewlehiya Bilind a Çorluyê têne girtin bi daxwaza wan sewqî girtîgehek din bikin û girtîgehên tîpa bîrê bên girtin dest bi greva birçîbûnê ya bêdem kirin.
Parêzerê girtiyên siyasî Umut Vedat Açar banga hestyariyê li raya giştî kir û xwest ku dengê girtiyan bê bihîstin.
‘TECRÎDEK DIJWAR HEYE, HEVDÎTIN TÊN ASTENGKIRIN Û PIRTÛKAN NADIN GIRTIYAN’
Endama Komîteya Lijneya Navendî ya Partiya Şoreşger Melîha Yuksel têkildarî mijarê ji ANFê re axivî û diyar kir ku du girtiyên ku li girtîgeha tîpa bîrê tên girtin xistine hucreyê û banga hestyariyê li raya giştî kir. Melîha Yuksel ev tişt anî ziman: “Girtîgehên tîpa bîrê girtîgehên ku herî zêde tecrîd lê tên meşandin in. Di dema avakrina wê de me jî û OHD’ê jî ev yek anîbû ziman. Me gotibû ev girtîgeh ji bo girtiyên sosyalîstên çepgir û şoreşgeran hatine çêkirin. Dengê me nehatibû bihîstin. Lê me dizanîbû ku wê me û şoreşgeran têxin wan girtîgehan. Endamên partiyên burjuwa jî di girtîgehên tîpa bîrê de tên girtin. Tecrîdeke dijwar heye. Hevdîtina girtiyan a bi hev re, derketina hewşê û guhertina pirtûkan qedexe ye. Wan dernaxin qadên hevpar.
Hevrêyên me yên ku ketine greva birçîbûna bêdem, piştî ku wan birine girtîgehên tîpa bîrê, hevdîtina bi malbat û wasiyan re nayê pejirandin. Hin name nayên şandin. Ew di qadeke 8 metreyî de dijîn û di bin tecrîda giran de ne. Tevî ku di hucreyê de ne jî cezayê hucreyê li wan dibirin. Ji bo îradeya girtiyên şoreşger û sosyalîst bişkînin van girtîgehan çêkirin. Du hevrêyên me ketine greva birçîbûnê ya bêdem û dixwazin wan bişînin girtgehên ku ew dixwazin. Em bang li raya giştî û rêxistinên civaka sivîl dikin ku bibin dengê girtyên ku di greva birçîbûnê de ne.”
