Li herêmê her ku diçe gefên li dijî îradeya gelan zêde dibin. Êriş û komkujiyên li taxên Kurdan û berdewamiya gefên dewleta Tirk û komên çete yên ser bi Colanî dewam dikin. Zêdebûna gef û êrişên komên çeteyên DAIŞ’î li gel Şengaliyên ku di fermanê re derbasbûne bûye sedema fikarên cidî. Endamên rêveberiya Şengalê Hevserokê Şaredariyên Gel ên Şengalê Xwedêda Îlyas û Riham Hesen hem metirsiyên heyî nirxandin, hem jî bi rêya ANF’ê bangên girîng li xelkê Şengalê kirin.
‘DIBE ŞEREKÎ DIJWAR RÛ BIDE’
Xwedêda Îlyas da zanîn ku tîşta a niha diqewime şerê berjewendiyan ê hêzên hegemonîk ên cîhanî ye û wiha axivî: ‘‘Şerekî cîhanî heye û ev ji sala 1990’î ve tê meşandin. Her kes ji bo berjewendiyên xwe şer dike û amadekariyeke şer heye. Dixwazin vî şerî li Rojhilata Navîn bi encam bikin, lê ev bi Rojhilata Navîn re jî bi sînordar namîne. Dewletên weke Ewropa, Emerîka, Îsraîl û Brîtanya şerê Ûkraynayê derxistin ji bo Rûsya ji Rojhilata Navîn derbixin û berjewendiyên xwe li herêmê mîsoger bikin. Tİfaqên berê hatibûn îmzekirin yên weke Sykes Picot jî êdî têrê nakin û niha behsa nexşeya Dawidî tê kirin. Şer li Filîstîn, Libnan, Sûriye, Yemen û Îranê dest pê kir. Ev jî dide nîşan ku em ê di şerekî dijwar re derbas bibin.’’
‘DIVÊ EM JI HER REWŞEKÎ NÛ RE AMADE BIN’
Îlyas ê ku behsa îhtîmala rûdayîna şereke dijwar dide, ji gel jî dixwaze xwe ji rewşeke şer re amade bikin û axaftina xwe wiha didomîne: ‘‘ Divê em amadekariya xwe bikin. Nabe ku em bêjin tiştek nabe. Divê em amadekariya xwe weke êrişeke mîna ya 2014’an pêk were, bikin. Ev qas biçekbûna dewletan wisa vala nîne. Em bang li gelê xwe dikin, amadekariya xwe ya her tiştî bike. Me dît ku ji bo Îsraîl çend parêzgehên Sûriye bigire, Sûriyeyiyan bi çend taxên Helebê re mijûl kir. Divê em pêşbînî bikin wê şereke çawa rû bide û xwe jî li gorî wê amade bikin ku rê nedin dewleta Osmaniyan vê rewşê ji xwere venegûherînin fersedekî. Weke nimûne niha li Îranê xwepêşandan heye, Emerîka dixwaze bikeviyê. Emerîka ketiye ku derê siyaseteke parçekirinê meşandiye. Gel ne di xema Emerîka, Îsraîl û Fransa de ye.’’
‘PERGALA RÊBER APO YA 50 SAL IN AVA KIRIYE XWE DISPÊRE HÊZA GELAN’
Xwedêda Îlyas di dewama axaftina xwe de bal kişand ser pergala ku xwe dispêre fikrê Rêber Apo û got: ‘‘Divê berxwedana ku em bikin, xwe bispêre fikrê Rêber Apo yê ev 50 sal in çandek ava kiriye. Pergaleke xwe dispêre îradeya gelan ava bûye û xwe naspêre siyaseta derve. Ev dikare bibe xeta sêyemîn û xwe bide qebûlkirin jî. Nêzîkî 50 salan e ev şervan axa Kurdistanê, gelê Kurd û hemû kêmneteweyan bi vê fikrê diparêzin.’’
‘BERXWEDANA 300 ŞERVANÊN HELEBÊ DERBASÎ DÎROKÊ BÛ’
Xwedêda Îlyas şehîdên berxwedana Helebê jî bi bîr anî û axaftina xwe wiha bi dawî kir: ‘‘Em şehîdên Şêxmeqsûd û Eşrefiyê bi bîr tînin ku bûn îradeya gel û paşvenekişiyan. Ew bûn îradeya gelê me yê Êzidî jî. Bi qasî ku me şopandiye 51 hezar çekdarên DAÎŞ’ê ên ser bi Ehmed Şera û dewleta Osmaniyan li dijî 300 ciwanên ji bo azadî, demokrasi û bihevre jiyanê têdikoşin, şer kirin. Hevalê Ziyad û hevalên wir dîrok nivîsandin û îradeya xwe teslîm nekirin. Heta hevalê Ziyad ku xwe feda kir, gotina xwe ya dawiyê ew bû rexnedayîna xwe ji gel re dida. Divê em îradeya civaka Êzidî jî xurt bikin û nehêlin careke din, teslîmê tu kesî bibin. Dewlet parçebûna me dixwaze û heya niha tiştek ji bo Şengalê nekiriye. Divê Şengal li pey şehîdên xwe biçin. Em divê xwedî li van şehîdên xwe derbikevin. Divê xelkê me yê Êzidî xwe kom bike, ji ber kes ji derve nayê me napêreze’’
‘BERXWEDÊRÊN HELEBÊ SERÎ JI ZILMÊ RE NE TEWANDIN’
Endama kordînasyona TAJÊ Riham Hesen jî behsa berxwedana şervan û gelê Helebê kir û got: ‘‘Niha şerekî gelekî dijwar û qirêj tê meşandin. Ev şer ne tenê leşkerî ye, li dijî gel û çandan e. Li hemû parçeyên Kurdistanê şer tê meşandin. Niha li Şêxmeqsûd, Eşrefiyê û Rojhilatê Kurdistanê gelê Kurd di komkujiyan re tên derbaskirin. Ji ber me weke civaka Êzidî heman tişt jiyan kiriye, em êşa wan baştir hîs dikin û dizanin. Berdewamiya fermana 2014’an niha li Helebê ye. Lê ew jî li berxwedan û serî ji zilmê re ne tewandin. Hevalên weke şehîd Ziyad û şehîd Amara canê xwe dan. Bi ew îradeya ji fikir û felsefeya Rêber Apo girtine, li ber xwe didin û ev îrade ne hate şikandin. Dilê me li gel wan lê dide. Wê sînorên heyî nekarin me ji hev qut bikin û emê heya dawiyê jî bihevre bin. Dijminê me jî yeke û hovîtiya wan ya li dijî me jî yeke. Koka vê hovîtiyê digihije dewleta Tirk û Emerîkayê. Armanc qirkirina gel e û tu rêzek ji ol û baweriyan re nagirin. Tu hurmeteke wan ji îradeya mirovahiyê re nîne. Dixwazin îradeya gelan tune bikin. Lê îradeya herî mezin gel bixweye û şerê gel ê şoreşgeriye ku niha li Rojava û Rojhilat tê meşandine.’’
‘DIVÊ EM WEKE ŞENGAL XWE JI HER REWŞEK RE AMADE BIKIN’
Riham Hesen ji Şengaliyan xwest, xwe li dijî her îhtîmalekî rêxistin bikin ku rewşeke weke 2014’an rû nede û axaftina xwe wiha bi dawî kir: ‘‘Şengal li ciheke stratejîk e û ne diyar e ku sibe ev şer veneguhêzin Şengalê. Divê em weke Şengal jî xwe ji her rewşek re amade bikin, rihê pêvajoyê rast bixwînin û her ferdekî civaka me xwe rêxistin bike, rola xwe ya welatparêziyê pêk bînin. Em dibînin şereke çawa li dijî gel tê meşandin, divê em jî xwe li gorî vêya amade bikin ku weke 2014’an bi serê civaka me ya Êzidî neyê.’’
