Hêzên Ked, Aştî û Demokrasiyê yên Stenbolê li Kadikoyê hatin cem hev û êrîşên çeteyên cîhadî yên li Sûriyeyê ku li dijî gelên Kurd, Elewî, Suryanî û Durzî pêk tînin, bi dirûşma “Em li dijî emperyalîzm û barbariyê li cem hemû gel û baweriyan in” protesto kirin.
Tevî hewaya sar û baranê beşdarî di asta herî jor de bû. Di protestoyê de Hevberdevka HDK’ê û Parlamentera Partiya DEM’ê Meral Daniş Beştaş, Parlamentera Partiya DEM’ê Kezban Konukçu, aktîvîsta TJA’yê Sebahat Tuncel û nûnerên gelek partiyên siyasî û saziyên demokratîk amade bûn. Di çalakiya ku di bin dorpêça polîsan de pêk hat de, pankarta “Em li dijî emperyalîzm û barbariyê li cem hemû gel û baweriyan in” hat hilgirtin.
‘BI GIRÊDANA QRAVÊTÊ Û MÊVANKIRINA LI QESRÊN SPÎ SÛC NAYÊN VEŞARTIN!’
Beştaş destnîşan kir ku niha li cîhanê gel di bin rejîmên totalîter û dîktator de d dinalin, lê gel li hemberî vê dorpêça emperyalîst û barbar bêdeng namînin û li ber xwe didin. Beştaş bi bîr xist ku HTŞ piştî hate ser desthilatdariyê, ewilî êrîşî Elewî, Durzî û Suryaniyan kir û niha jî gelê Kurd û nirxên mirovahiyê kiriye armanc û wisa domand: “HTŞ ku berdewama DAIŞ’ê ye, dixwazin ew sûcên li dijî mirovahiyê yên duh li Şengalê kiribûn, niha bi fermî li Şamê dema li ser desthilatdariyê ne bidomînin. Lê her kes dizane ku bi girêdana qravêtê, bi mêvankirina li Qesrên Spî yan jî bi piştgirîdayîna wan, sûcên li dijî mirovahiyê nayên veşartin. Li Sûriyeyê çi dibe bila bibe, dê bi têkoşîn û yekîtiya gelê Kurd, Elewî, Durzî û nasname û baweriyên din bi ser bikeve. Gumanek me ji vê nîn e. Lê binêrin, îro yên ku nirxên mirovahiyê diparêzin mixabin di bin gefa komkujiyeke nû de ne. Li Helebê li taxên Kurdan ên Eşrefiye û Şêxmeqsûdê êrîşî 200 hezar mirovî kirin bi tank, top û bi hezaran hêzên leşkerî. Jin ji qatên jor hatin avêtin, bi deh hezaran mirov bi zorê hatin koçberkirin. Em ê dirûşma ‘Jin Jiyan Azadî’ ya ku Jîna Mahsa Emînî wekî mîras ji me re hiştiye li her derê bilind bikin. Jin dê li Rojava wekî her carê li ber xwe bidin, têkoşînê bikin û rêxistinbûna xwe mezin bikin.”
