Endamên Deste û Meclîsa Cibicî ya Kantona Cizîrê, bi daxuyaniyekê diyar kirin ku ew tevlî banga seferberiyê ku ji hêla Rêveberiya Xweser a Demokratîk a Bakur-Rojhilatê Sûriyeyê hatî ragihandin dibin. Endamên meclîs û desteyên Kantona Cizîrê helwest û tevlîbûna xwe ya vê seferberiyê anîn ziman.
Endama Meclîsa Gel a Demokratîk a Kantona Cizîrê Zûzan Silêman, diyar kir ku ew ê ji projeya Rêveberiya Xweser a li ser bingeha xwişk-biratiya di navbera gelan de hatiye avakirin biparêzin. Zûzan Silêman, anî ziman ku ew aştiyê dixwazin, lê li hemberî her êrîşek muhtemel ew ê axa xwe û destkeftiyên ku bi xwîna şehîdan hatine bidestxistin biparêzin.
Endama Meclîsa Çand û Ronakbîriyê ya Kantona Cizîrê Ruba El Firêhatî, jî da xuyakirin ku pirrengiya çandî û olî ya li herêmê ne qelsiyek e, lê belê hêzek e li dijî hemû gefan e û got ku ew ê li kêleka hêzên ku şoreşê diparêzin bisekinin.
Hevseroka Desteya Çand û Huner a Kantona Cizîrê Firyal Çolî, jî diyar kir ku armanca seferberiyê ew e ku her kes xwedî li destkeftiyên şoreşê derkeve. Firyal Çolî, destnîşan kir ku dê li ser asta tax û saziyan komîte werin avakirin da ku berdewamiya ewlehî, tenduristî û xizmetên civakî misoger bikin û got ku hemû gel dê bi hev re ji bo parastina herêmê bixebitin.
