Bi sedan şêniyên kantona Firatê, endamên saziyê Rêveberiya Xweser, rêxistinên jinan û partiyên siyasî şervanên QSD’ê şehîd Emar Kobanê (Omer Bozan) ku di 17’ê Çileya 2026’an li Meskenê şehîd bûbû, îro li Pakrewangeha Şehîd Dîcle spart axê.
Her wiha endamê Hêzên Ewlekariya Hundirîn şehîd Şervger Baz (Azad Seydî) ku di 10’ê Çileya 2026’an de li Şêxmeqsûdê şehîd bûbû û Nazlican Kobanê (Ezîze Hiso) ku di 10’ê Çileya 2026’an de li Şêxmeqsûdê şehîd bûbû, hatin bibîranîn.
Merasîm bi rêzgirtinê dest pê kir. Dûre rêvebera Meclisa Jinan a Partiya Yekitiya Demokratîk (PYD) a kantona Firatê Bedîa Miho sersaxî ji malbatê şehîdan re xwest û soza û şopandina rêya wan da.
Bedîa Miho anî ziman ku ew ê xewn û xeyalên şehîdên xwe pêk bînin û şopdarên rêya wan bin û wiha got: “Em xwedî hêz in, tu kes bi hêza me nikare û kes nikare vîna me têk bibe. Ji ber ku em hêza xwe ji mîrasa şehîdên xwe digirin. Ji ber vê yekê em ê her tim xwedî mîrasa şehîdên xwe derkevin.”
Hevserokê Meclisa Malbatên Şehîdan a Kantona Firatê Mihemed Bozî destnîşan kir ku ew ê bi hemû hêza xwe li hember êrişên dijmin tê bikoşin û wiha got: “Em ê bi hemû hêza xwe li hember êrişan têkoşînê bikin û li ber xwe bidin. Em ji hêza xwe bawer in, wê her tim serkeftin a me be. Em ê şopdarên rêya şehîdên xwe bin.”
Dûre hevrêyê şehîd Emar Kobanê, Ararat Cûdî jî anî ziman ku şehîd Emar li hemberî dimin berxwedaneke bêhempa da meşandin û wiha got: “Em jî soz didin ku em ê bi hemû hêza xwe li hemberî dijmin têkoşînê bikin û şopdarên rêya şehîdên xwe bin heta kêliya dawiyê.”
Her wiha welatiyê bi navê Mehmûd Mihemed ku di êrişa çeteyên hikumeta demkî ya Şamê û çeteyên DAÎŞ’ê de şehîd bûbû, li Pakrewangeha Şehîdên Komkujiyan a li Taxa Şehîd Xebat a Kobanê hate veşartin.
