Şervanên QSD û YPJ’ê vîdyoyek ji girtîgeha Eqtanê ya li Reqayê ku çeteyên DAÎŞ’ê lê girtîne şandin.
Şervanan diyar kirin ku du roj in di bin êrîşên dijwar ên çeteyên HTŞ’ê yên ku ji hêla dewleta Tirkiyê ve têne piştgirîkirin de ji bo parastina girtîgehê berxwedanek mezin didin û gotin, “Li vê girtîgehê kesên ku sûcên li dijî mirovahiyê kirine tên girtin. Bi salan e, me li kêleka hêzên Koalîsyona Navneteweyî li dijî van çeteyan şer kiriye. Çeteyên bi heman zîhniyetê dixwazin çeteyên xwe ji vir rizgar bikin. Em li vir berxwedanek mezin didin. Du roj in, çeteyên dewleta Tirk û çeteyên girêdayî hikûmeta demkî ya Sûriyeyê bi tank, top û çekên giran êrîşî vê girtîgehê dikin, hewl didin ku çeteyên xwe rizgar bikin.”
Şervanan anîn ziman ku ew bang li tevahiya mirovahiyê dikin û gotin, “Ger ev çete ji vir werin berdan, ew ê ne tenê ji bo Sûriyeyê, ji bo tevahiya mirovahiyê xeterek çêbikin. Em bang li her kesî dikin ku bi berpirsiyarî tevbigerin da ku ev girtîgeh nekeve destê çeteyên xwedî heman zîhniyetê.”
Şervanan abi bîr xistin ku du hevalên wan di parastina girtîgehê de şehîd bûne û heşt jî birîndar bûne û wiha bi dawî kirin: “Me soz da û em ê vê derê biparêzin. Em ê li vir berxwedanek mezin bikin. Heta ku em van çeteyan radestî hêzek navneteweyî bikin em ê li ber xwe bidin. Ev berpirsiyariyek mirovî ye û li ser milê me hemûyan e. Ji ber vê yekê, em bang li Koalîsyona Navneteweyî dikin ku destwerdanê bike da ku pêşî li sûcên nû yên li dijî mirovahiyê bigire. Îro, wan çeteyên xwe li Şedadê berdan. Piştre wan hêzên me sûcdar kirin. Gotin ku hêzên QSD’ê çete berdane. Em ê li vir bi israreke mezin li ber xwe bidin. Çawa ku me 10 salan li dijî van çeteyan şer kir, em ê niha jî şer bikin. Em ê heta dilopa xwîna xwe ya dawî li ber xwe bidin. Em ji her kesî re serkeftinê dixwazin. Serkeftin a me ye.”
