Meclisa Bajarê Dirbêsiyê yê kantona Cizîrê îro bi amadebûna bi dehan şêniyan, endamên saziyên sivîl, meclis, partiyên siyasî û tevgerên ciwanan û jinan daxuyaniyek da û tevlêbûna xwe ya seferberiya giştî ragihand.
Daxuyanî li Qada Jina Azad ji aliyê hevseroka Meclisa Bajarê Dirbêsiyê Raziya Îbrahîm ve hate xwendin.
Di daxuyaniyê hate gotin ku berxwedana rewa, yekitî û îradeya gel li dijî polîtîkayên hikumeta demkî ya Şamê, çekên herî bihêz in. Daxuyaniyê wiha lê zêde kir: “Em, xelkê Dirbêsiyê, bi gund û saziyên wê, bersiva banga giştî ya seferberiya ku ji hêla Rêveberiya Xweser ve hatiye ragihandin, didin.”
Her wiha hat gotin ku hikumeta demkî bi biryar e ku nasnameya gelê Kurd înkar û tune bike, lewma hemû peyman, tevî peymana 10`ê Adarê bi fermana dewleta Tirk binpê kirin.
Şêniyên Dirbêsiyê diyar kir ku çawa berxwedana Kobanê bi serk ket, dê vê carê jî berxwedana Rojava bi ser bikeve.
