Ji fermandarên Yekîneyên Parastina Jin (YPJ) Nisrîn Ebdulah ku niha li bajarê Kobanê ye ji ANF`ê re axivî û anî ziman ku ew ê li Kobanê heta dawiyê berxwedaniyeke dîrokî raber bikin.
Fermandara YPJ’ê Nisrîn Ebdulah a ku a niha di nava berxwedanê de cih digire, ev yek anîn ziman: ‘’Em ew ruhê berxwedanê yê gelê Kurd pîroz dikin. Moral û cesareta me bi wî ruhî berdewam dibe. Her çendî em li qada jina azad ya li Kobanê ne jî hevalên me di çeperên herî pêş de berxwedaneke dîrokî nîşan didin. Em ê xaka xwe ji tu kesî re nehêlin. Em in xwediyên vê xakê. Em ê nehêlin Kobanê bi wan gemaran qirêj bibe.”
Fermandar Nisrîn Ebdulah piştre diyar kir ku çeteyên hov mirovahiyê nas nakin û wiha axaftina xwe berdewam kir: ‘’Em bi biryar in ku li hemberî van çeteyan berxwedaniya xwe di asta herî xurt de bilind bikin, heya ku em sax bin em ê di nava vî gelî de bin û ger em şehîd bûn jî em ê dîsa di nava vî gelî de bin. Ez jî weke şervaneke vî gelî û fedayîya vî gelî em ê wî ruhê têkoşînê di asta herî xurt de berdewam bikin. “
Nisrîn Ebdulah di dawiya axaftina xwe de peyama bilindkirina berxwedanê da û wiha got:” Em ê heta dawiyê bi vî gelê berxwedêr re bin. Heta ku em bibin layîqî vê berxwedaniyê. Em ê heta dawiyê li ber xwe bidin.”
