Êrîşên dagirkeriyê yên çeteyên dewleta Tirk, DAÎŞ û HTŞ’ê yên li ser Bakur û Rojhilatê Sûriyeyê, dewam dikin.
Kobanê ya ku salên 2014-2015’an li dijî DAÎŞ’ê bûye sembola berxwedanê, di hedefa çeteyan de ye. Xelkê herêmê li ser bingehê xweparastinê li dijî çeteyan xwe bi rêxistin dike, şervanên azadiyê yên gelan jî li eniyên pêş li ber xwe didin. Têkildarî berxwedanê şervanên azadiyê ji ANF’ê re axivîn.
Şervana YPJ’ê Amara Mêrdîn destnîşan kir ku ew li eniyê Kobanê bi gel re li ber xwe didin û got, “Bi hêza ku em ji gelê xwe digirin û îradeya ku em ji şehîdan digirin, em li vir li ber xwe didin. Şîara me ‘Berxwedan Jiyan e’. Em ê heya dilopa dawî ya xwîna xwe li ber xwe bidin. Em ê nehêlin dijminê hov ê li vî welatî yek gav bavêje.”
Amara gelê li parçeyên din ên Kurdistanê silav kir û bal kişand ser girîngiya yekîtiya Kurdî. Amara got, gelê Bakur ji bo piştgiriya Kobanê divê sînoran derbas bike.
Şervanê YPG’ê Seydo Kobanê jî wiha axivî, “Di dûrahiya 20 km a ji Kobanê de, em li refên herî pêş in. Dijminekî hov li pêşberî me ye ku dixwaze gelê me û nirxên gelê me tune bike. Em amada ne li ser xaka xwe ji bo jiyaneke bi rûmet canê xwe feda bikin. Xelkê Kobanê bila vê baş bizane: Şervanên azadiyê gelê xwe diparêze. Dijmin teknîkek çiqas xurt bi kar bîne bila bi kar bîne, em ê bersiva pêwîst bi rengekî herî tund bidin.”
Piştre şervana azadiyê Amara Mêrdîn bi hevalên xwe yên li eniyê re strana ‘Destana Rojava’ got.
