Êrişên dewleta Tirk, DAÎŞ û HTŞ’ê yên li ser Bakur û Rojhilatê Sûriyeyê dewam dikin.
Li gel agirbesta ku qaşo hatiye ragihandin jî çeteyên Şam-Enqereyê êrişên xwe giran dikin. Bi taybetî Kobanê ji çar aliyan ve dorpêçkirî ye. Li Hesekê, Qamişlo û herêmên bejahî jî berxwedan bi biryardarî dewam dike.
Îdîayên “Hesekê hate bidestxistin” ên dewleta Tirk û çeteyên HTŞ’ê yên li ser medya dîjîtal pûç bûn. Hêzên Sûriyeya Demokratîk (QSD), Yekîneyên Parastina Jinê (YPJ) û gelê herêmê vê propagandayê pûç dikin.
Şervanekî QSD’ê ku li qadê li dewriyeyê digere dîmen ji ANF’ê re şand û destnîşan kir ku rewşa li derdora Hesekê di bin kontrolê de ye. Di dîmen de şervan got, “Yên ku dibêjin bajarê Hesekê di destê çeteyan de ye bila bibînin. Em niha li ser rêya Hesekê ne. Em ber bi Reqayê ve diçin. Hevalên me hemû li qadê û eniyê ne. Em li benda dijmin in. Ew neyên em ê bi ser wan de biçin. Bila dilê gelê me rehet be. Ev rê rêya Ebyadê ye û çiyayê Ebûl Ezîz (Kezwana) ye. Gundê Til Barût jî li wir e.”
Şervanekî YPG’ê jî anî ziman ku ew ji Hesekê ber bi Reqayê ve diçin û got, “Niha em ji Hesekê derketine. Ji vê derê bi 15 kîlometreyan em ber bi Reqayê ve diçin. Ev herêm bi temamî di destê şervanên YPG û YPJ’ê de ye. Bi şev û roj YPG-YPJ di nobedê de ne. Bila dilê gelê me rehet be.”
