Direktora Lêkolînê ya Enstîtuya Aşitiyê ya Kurdî Meghan Bodette têkildarî êrîşên çeteyên girêdayî HTŞ, DAÎŞ û dewleta Tirk ên li ser Rojava û krîza mirovî ya li herêmê ji ANF’ê re axivî.
Meghan Bodette di destpêka axaftina xwe de êrîşên çeteyan ên li ser Rojava şermezar kirin, berxwedana gelê Kurd ê li Rojava silav kir û ev yek anîn ziman: ‘’A niha Rojava di bin êrîşan de ye. Çar rojan beriya niha agirbest hatiye îlankirin. Di navbera QSD û hêzên Şamê de agirbest heye. Wê îro agirbest bi dawî bibe. Hêzên Şamê dixwestin li Qamişloyê û bajarên Kurdan sûcên şer pêk bînin. Rêveberiya Şamê hewl dide ku dewleteke hişk û otorîter ava bike. Ji ber ku armanca wan qirkirin û valakirina heremê ye. Hebûna gelê Rojava jî li hemberî vê hişmendiya îslamî ya radîkal asteng e.’’
Meghan Bodette piştre bal kişand ser girîngiya berxwedana li Rojava û got: ‘’Gelê Rojava jî ji bo mafê xwe yê parastinê, mafê xwe yê rêvebirinê û mafê xwe yê parastina çandî li ber xwe dide. Ji ber vê sedemê ev berxwedana ku li Rojava, pir girîng e. Lê belê divê çareseriyeke mayînde were peydakirin. A niha ne diyar e ku wê di rojên pêş de çi bibe. Ez dixwazim balê bikşînim ser du xalan. Li Rojava rewşa mirovî pir giran e. Heyva Sor a Kurd diyar kir ku a niha li Kobanê çar zarokan ji ber sermayê jiyana xwe ji dest dane. Em dibînin ku li Kobanê ceyran, înternet, av û pêdiviyên jiyanî nayên peydakirin. Kobanê di bin dorpêçê de ye. Pêwîst e ku erka koalîsyona navneteweyî bi dawî nebe. Ji bo dorpêça li ser Kobanê dikare bikeve nav liv û tevgerê.’’
Direktora Lêkolînê ya Enstîtuya Aşitiyê ya Kurdî Meghan Bodette di dawiya axaftina xwe de diyar kir ku divê raya giştî ya navneteweyî li hemberî krîza mirovî ya li Rojava bêdeng nemîne û ev yek anîn ziman: ‘’A niha saziyên mafên mirovan ên li çar perçeyên Kurdistanê û li gelek welatên din dikarin kampanyayên alikariyê pêşkêş bikin. Em ji bo çareseriyeke aşitiyane kar dikin. Em bi hêvî ne ku wê bi saya berxwedana vî gelî û piştgiriya gelên li heremê krîza li Rojava çareser bibe.’’
