Ji bo taziyeya şervana YPJ’ê seredaneke girseyî çêbû

Ji bo endama Yekîneyên Parastina Jin (YPJ) Havva Ûgûrlû (Rûken Botan) ku di 21’ê Çileyê de li bajarê Reqayê yê Bakur û Rojhilatê Sûriyeyê şehîd bû, li gundê Melêsayê yê Elkê ya Şirnexê taziye hate danîn. Taziye bi girseyî hate ziyaretkirin. 
 
Nûnerên partiyên siyasî, rêxistinên civaka sivîl û gelek welatî bi pêşengtiya MEBYA-DER’ê çûn serdana taziyeyê. Girseya ku di têketina gund de kom bû, bi dirûşmên “Şehîd namirin” û “Bijî berxwedana Rojava” ber bi cihê taziyeyê ve meşiyan. 
 
Hevseroka MEBYA-DER a Şirnexê Emîne Akiş di serdanê de got ku destketiyên Rojava encama bedelên hatine dayin e. Hevseroka DEM Partiyê ya Şirnexê Taybet Bîlgî jî got ku dîwarên tirsê bi pêşengtiya têkoşîna jinê hatine hilweşandin û wiha got: “Rûken, hevrêya me bû. Mezinkirina têkoşîna wê û bicihanîna xeyalên wê, erk û peywira me ye.” 
 
Parlamenterê DEM Partiyê yê Amedê Serhat Eren jî got: “Gelê Kurd bi sedan sala ye ji bo hebûna xwe têdikoşe. Li ku derê zordestiyek hebe, li wir berxwedan heye. Ger zilm hebe, lehengên Kurdistanê jî hene. Gelê Kurd di dîroka xwe de tu caran serî netewandiye. Ger îro behsa yekîtiya Kurdan were kirin, ev bi xêra lehengên jiyana xwe ji dest dane û Rêberê Gelê Kurd Abdullah Ocalan e. Em dixwazin bi hev re bijîn. Ev jî bi naskirina gelê Kurd dibe.”