Endama Koordînasyona Kongra Star a Kobanê Xunav Xelîl bi boneya 8’ê Adarê Roja Jinên Kedkar a Cîhanî ji ANF`ê re axivî û anî ziman ku 8’ê Adarê li dijî desthilatdariyê roja vejînê ye.
Xunav Xelîl di destpêka axaftina xwe 8’ê Adarê li tevahiya jinan pîroz kir û ev yek anîn ziman: ‘’Ev roj, di dîrokê de li dijî desthilatdariyê roja vejînê ye ku jin rastî gelek zehmetiyê hatine. Ji civaka xwezayî ve ye ku wê demê jinan civaka xwe bi rê ve dibir, piştî derketina fikra baviksalarî û xweferzkirina li ser jinan, xwestin jinan di nava çar dîwaran de bihêlin û mafê wan ji wan were standin. Heta di karkirinê de jî mûçeya jinan ji ya zilaman kêmtir bû. Piştre jî jinan li hemberî desthilatdariyê şoreş dan destpêkirin û desthilatê jî ew jin di kargehê de şewitandin. Xwestin dengê jinan bi vî rengî qut bikin.’’
Xunav Xelîk piştre anî ziman ku piştî derketina fikrên Rêber Apo, jinan xwe careke din îsbat kir û got: “Cara yekem xeta jina azad ku bi saya Rêberê Apo ku jinan xwe di wir de dîtin, ji nû ve jinan dest bi têkoşînê kirin û li ser xeta Sakîneyan, me şoreş da destpêkirin. Li her çar parçeyên Kurdistanê jinan hebûna xwe misoger kir. Şoreşa Rojava jî îsbat kir ku jinan ji bo nasname û îradeya xwe dest bi têkoşînê kirin. Jinan di her warî de cihê xwe girtin, bi hejmarekî gelekî mezin civaka xwe bi rê ve dibir. A niha di warê siyasî, diplomasî û heta di hemû beşên civakê de cihê xwe girtine.”
‘DESTHILATDARÎ JI FIKRA JINA AZAD DITIRSE’
Xunav Xelîl di dewama axaftina xwe de diyar kir ku desthilatdarî ji fikra jina azad ditirsin û ev yek anîn ziman: ‘’Desthilatdarî ji hêza jinan ditirsin û ji ber vê yekê jî tim û tim xwestin şoreşa ku ji aliyê jinan ve hate destpêkirin, di şexsê jinan de biçewisînin. Bi taybetî jî ji aliyê dewleta Tirk ve ew jinên pêşeng dihatin hedefgirtin. Xwest di şexsê şehîdên weke Nûjiyan, Viyan, Ronahî, Dilar, Zehra, Kobanê, Yadê Emîne û gelek jinên din de civaka demokratîk tune bike. Her wiha di şerê herî dawiyê de yê li Taxa Şêx Meqsûdê bi heman zîhniyetê şervaneke jin ji qata siyan a bînayê avêtin xwarê. Li Reqayê jî li gel qutkirina keziya şervanekê xwestin nîşan bidin ku armanca wan tunekirina şoreşa jinan e. Lê belê bi qutkirina wê keziyê re careke din bi pêşengtiya jinan serhildanek çêbû û tevahiya jinên cîhanê weke volkanekê li hemberî desthilatdariyê rabûn. Bi destê jina azad şoreşa ‘Jin, Jiyan, Azadî’ dest pê kir.’’
‘WÊ TÊKOŞÎNA JINAN HER BILIND BIBE’
Xunav Xelîl di dawiya axaftina xwe de diyar kir ku ew ê îsal bi coşa jina azad 8’ê Adarê pîroz bikin û got: “Xwestin bi van êrîşan jinan qir bikin û civakê jî tune bikin. Em jî xwediyê dîrokeke kevnar in wê kesek nikaribe me tune bike. Em ê bi rengê jinan Sûriyeyeke pirreng ava bikin. Divê her pêkhateyek bi rengê xwe û zimanê xwe be. Rêya me ya têkoşînê dirêj e û em ê jî bi wê rihê têkoşînê rabin ser piyan. Her wiha em hemû jinên Kobanê jî vedixwînin şahiya 8’ê Adarê.”
