Di çarçoveya Rojên Çanda Jinên Kurd ên Berlînê de belgefîlmên derhêner Hêvî Nîmat Gatar û Bêrîvan Sarûhan di roja dawî ya şeva fîlman de hatin pêşandan. Şeva fîlman bi beşdariya gelek kesan li Kiezraum Mehringdamm a Berlînê pêk hat.
Pêşandana fîlman ji hêla Dest Dan Women’s Council e.V., Hunera Mizgîn, Jinên Koma Feraşîn û Delîl Çiyager, Jinên Ciwan Berlîn, KJAR û Nivîsgeha Aştiyê ya Jinên Kurd – Cênî e.V. ve hatin lidarxistin. Şeva fîlman a ku bi pêşengiya jinan hat lidarxistin du belgefîlm hatin pêşandan.
Pêşî belgefîlma derhêner Bêrîvan Sarûhan, “Stêrka li ser xetê” hat pêşandan. Sarûhan li bajarê Mêrdînê yê Kurdistanê ji dayik bûye. Sarûhan di sala 2017’an de ji Beşa Ziman û Wêjeya Kurdî ya Zanîngeha Artûklû ya Mêrdîn mezûn bûye û niha li heman zanîngehê lîsansa bilind dibîne. Sarûhan wekî dilxwaz û profesyonel di gelek saziyên sivîl ên balê dikişînin ser koçberî û tundiya li dijî jinan xebitiye. Belgefîlma “Stêrka Li Ser Xetê” berhema yekem a Sarûhan e.
Di şeva fîlman de belgefîlma femînîst “GotûbêJin” a derhêner Hêvî Nîmat Gatar kiriye hat nîşandan. Gatar, derhêner û civaknasek Kurd e. Li ser patriarka, mêranî û jinan nîqaşan dimeşîne û bi rêya sohbet û dengbêjiyê dengê jinan û zayenperestiya civakî rexne dike.
Belgefîlma “GotûbêJin” balê dikişîne ser pêşandanên fîlmên gerok ên ku bi taybetî ji bo jinan li bajarên Kurdan têne organîzekirin. Fîlm nîşan dide ka ev nîşandan çawa bûne xaleke destpêkê ji bo nîqaşên li ser baviksalarî, mêraniyê û ezmûnên jinan. Bi rêya sohbet û stranên dengbêjan, fîlm li ser dengê jinan û rexneyên li ser rolên zayendî disekine.
Piştî pêşandana belgefîlman,bi beşdariya derhêneran rûniştineke pirs û bersivan bi îngilîzî hat lidarxistin. Di şevê de banga beşdarbûna çalakiyên 8’ê Adarê Roja Jinan a Cîhanê hat kirin.
