Di çarçoveya lêpirsîna windakirina xwendekara Zanîngeha Munzurê Gulîstan Doku de, piştî ku îfadeyên kiryaran ên li cendirmeyê bi dawî bûn, veguhastin edliyeyê hatin kirin. 13 kesên ku îfadeyên wan ji aliyê dozgeriyê ve hatin girtin, veguhastin dadgehê.
Di destpêkê de îfadeya polîsê berê Gokhan Ertok hat girtin û bi sûcê “tune kirin, veşartin an jî guhertina delîlên sûc” hat girtin. Derbarê Memûrê Îdareya Taybet a Bajêr ê wê demê Erdogan Elaldı de jî bi sûcê “bi qestî kuştinê” biryara girtinê hat dayîn.
Piştre, berpirsên kamerayan ên Zanîngeha Munzurê Suleyman Onalan û Savaş Gulturk bi daxwaza girtinê veguhastin Dadgeha Ceza ya Sulhê ya Dêrsimê. Onalan û Gulturk piştî îfadeyên li dadgehê bi şertê kontrola dadî hatin berdan.
Duh jî kiryarên bi navê Celal Altaş, Nurşen Arıkan, Ferhat Guven û Cemile Yucer bi daxwaza girtinê; Uğurcan Açıkgoz jî bi daxwaza kontrola dadî û qedexeya derketina derve veguhastin dadgehê. Ji van kesan Celal Altaş, Nurşen Arıkan, Ferhat Guven, Cemile Yucer, Engin Yucer û Zainal Abakarov hatin girtin. Ugurcan Açıkgoz bi tevdîra kontrola dadî serbest hat berdan.
Parêzvanê nêz ê Tuncay Sonel, Şukru Eroglu û kurê Tuncay Sonel, Mustafa Turkay Sonel jî bi sûcê “bi qestî kuştinê” hatin girtin.
Bi biryara girtinê ya dawî re hejmara kesên di çarçoveya dosyayê de hatine girtin derket 10’an.
Li aliyê din, pêvajoya binçavkirinê ya Waliyê wê demê Tuncay Sonel û Serbijîşkê berê yê Nexweşxaneya Dewletê ya Dêrsimê Çagdaş Ozdemir berdewam dike.
