Komîteya Ragihandinê ya Kongreya Neteweyî ya Kurdistanê (KNK), bi boneya 22’yê Nîsanê Roja Rojnamevaniya Kurdî daxuyaniyek weşand.
KNK’ê di daxuyaniya xwe de bi bîr xist ku 128 sal berê, di 22’yê Nîsana 1898’an de yekemîn rojnameya bi zimanê Kurdî ya bi navê “Kurdistan” bi ked û xebata Mîqdad Mîdhed Bedirxan derketiye. KNK vê rojê wek ‘çirayeke her dem geş’ pênase kir û hemû rojnamevanên biwêrek û rastgo, pîroz kir.
Di daxuyaniyê de hat destnîşankirin ku rojnamevanî ne tenê pîşeyek e, di heman demê de di civaka modern de hêza çaremîn e û xwedî hêzeke manewî ya mezin e ku civakê araste dike. KNK’ê di dewama daxuyaniya xwe de got: “Medya ew qad e ku kar li ser rehendên piştguhkirî, quncikên tarî yên desthilatan û dengên nebihîstî yên gel dike.”
TÊKOŞÎNA LI DIJÎ ASÎMÎLASYONÊ
KNK’ê di dewama daxuyaniya xwe de bal kişand ser rewşa Kurdistanê ya bindest û ev yek anîn ziman: “Ji roja yekem heta îro, gel û nîştimana me rûbirûyî êrişên asîmîlasyon û komkujiyê hatine. Di vê serdema ku wek ‘Şerê Cîhanê yê Sêyem’ tê pênasekirin, erka rojnamevaniya Kurdî hê girantir e.’’
ŞEHÎDÊN ÇAPEMENIYÊ
KNK’ê piştre şehîdên çapemeniyê bi bîr anîn û got: ‘’Em bejna xwe bi rêzdarî li ber hemû wan rojnamevanan ditewînin ku li seranserê Kurdistanê tenê ji ber gotina rastiyan hatin şehîdkirin. Her wiha em silavên germ ji bo wan rojnamevanên wêrek dişînin ku li quncikên zîndanan parastina nirxên azadiyê kirin.”
KNK’ê herî dawiyê ragihand ku ew hertim piştgiriya deng û rengê ragihandina niştimanperwer dikin û careke din Roja Rojnamevaniya Kurdî pîroz kir.
