Li navçeya Elbakê ya Wanê duh polîsan 3 ciwanên bi navê Fatîh, Îsmaîl û Diyar Deger ku birayên hev in, bi awayekî derqanûnî binçav kiribûn û di dema binçavkirinê de êşkence li wan kiribûn. 3 ciwanên ku hatibûn êşkencekirin, ragihandin ku wan polîsên sivîl ji ber ku li gorî rêzikên trafîkê tevnegeriyane hişyar kirine û polîsan jî li wan dane. Piştî bûyerê ciwan bi malbatên xwe re çûbûn nexweşxaneyê û rapora lêdanê hilgirtibûn û dan zanîn ku ew dê derbarê polîsan de giliyê bikin.
Rêxistina DEM Partiyê ya Elbakê jî îro li navçeyê êşkenceya li 3 birayan hatiye kirin bi çalakiyekê şermezar kir. Parlementerê DEM Partiyê yê Wanê Mahmût Dîndar û rêveberên DEM Partî û DBPê yên Elbakê bi tevlîbûna welatiyan li sûka navçeyê meşek lidar xistin û daxuyaniyek dan. Di daxuyaniyê de hat destnîşan kirin ku ew dê şopdarê bûyerê bin û xwestin polîsên bersûc bên cezakirin.
