Hevserokê Giştî yê DEM Partiyê Tuncer Bakirhan, bi boneya 23’yê Nîsanê salvegera damezrandina Meclîsê li Lijneya Giştî axivî. Bakirhan, di serî de ji bo kesên ku di êrîşên li ser dibistanên navçeya Sêwereg û Mereşê de jiyana xwe ji dest dane sersaxî û ji birîndaran re jî şîfa xwest.
Bakirhan diyar kir ku di sedsala 20’an de komar şoreşek bû û wiha axivî: “Wekî gelên li vî welatî em bi hev re bi ser ketin. Lê ew ruhê serkeftinê piştî damezrandina komarê hat piştguhkirin û gel tune hatin hesibandin. Lê komareke demokratîk bi beşdariya hemû gelan pêkan bû. Ew firsend nehat bikaranîn. Em jî li vir dibêjin; em dixwazin komar hemû gel û neteweyan bicivîne. Di salên 1920’an de dema li cîhanê tevlîhevî hebû, li vê Meclîsê beşdariya gelan û aqilê hevpar hebû. Dengên cuda di bin vî banî de axivîn. Niha jî em di serdemeke wisa de ne. Rojhilata Navîn ji nû ve tê dîzaynkirin û dinya careke din tê avakirin. Em careke din piştgiriyê didin xurtbûna jiyana bi hev re, ku tu kes tune neyê hesibandin. Wê rojê hebûn bi çekê dihat parastin, îro em dikarin hebûna xwe bi demokrasî, hiqûq û muzakereyan biparêzin.”
Bakirhan, bal kişand ser Pêvajoya Aştî û Civaka Demokratîk û axaftina xwe wiha domand: “Pêvajoya Aştî û Civaka Demokratîk ku zêdetirî salekê ye berdewam dike, cara yekem e partiyên siyasî bi berpirsyariyeke hevpar tevdigerin û meclîs jî berpirsyariyê hildigire ser milên xwe. Ev geşedanên biwate ne û di sedsala 2’yemîn de ji nû ve avakirin di destê meclîsê de ye. Bi demokratîkbûnê ve temambûna komarê dikare pêdiviya hemû gelan bi cih bîne. Yên komar damezrandin dewletek ava kirin. Ya ku dikeve ser milê me jî ew e ku em vê dewletê bi awayekî ku hemû kes tê de wekhev û azad bijîn, ava bikin. Di sedsala 2’yemîn de pêdivî bi aqilekî demokratîk heye. Bingeha wê jî Komara Demokratîk e. Komara Demokratîk ne dewletê derdixe derve û ne jî demokrasiyê. Dewlet û demokrasiyê bi hev re diparêze. Tirkiye ji ber erdnîgariya xwe hem li hemberî derfetan û hem jî xetereyan e. Ji bo wê jî parastina wê bi Komara Demokratîk pêkan e. Rojhilata Navîn bûye qada agir. Di rewşeke wisa de aştiya hundirîn ne tercîhek, mecbûriyetek e. Niha em dikarin jiyana bi hev re ya Kurd û Tirkan li ser wekhevî û demokrasiyê pêk bînin.”
Bakirhan, anî ziman ku divê ji bo avakirina aştiyê hemû kes berpirsyariyê bigirin û wiha dirêjî da axaftina xwe: “Çekberdana PKK’ê geşedana herî girîng bû. Berdana çekan nîşaneya vîna ji bo demokrasiyê bû. Helbet gavên ku divê rêxistin biavêje hene. Lê tu aştî bêyî vîneke hevpar pêk nayê. Tu aştiyeke mezin di rojekê de pêk nehat. Di vê serdemê de pêdiviya me ne bi gumanan, bi baweriyê; ne bi xitimînê, bi vekirina rê heye. Me ev welat bi hev re rizgar kir û bi hev re parast. Lê di 4’ê Adarê de bi Qanûna Teqrîrî Sukûn yekitî û xwişk-biratiya me hat birîndarkirin. Niha divê em dîsa yekitiya xwe pêk bînin. Divê em ruhê yekitiyê yê Milazgirê û parastina welat a Çanakkaleyê nûjen bikin. Tevlîbûna Kurdan a li hiqûqê wekî welatiyên wekhev, dê bibe qonaxa duyemîn a demokratîkbûna komarê. Divê komar mafên hemû netewe û baweriyan biparêze. Niha dem dema bi hev re avakirina aştî û demokrasiyê ye. Divê hemû kes berpirsyariyê bigirin. Yên berpirsyariyê negirin sibe nikarin li rûyê zarokên xwe binêrin. Dîrok ne yên şer dertêxin, lê yên aştiyê ava dikin dinivîse.”
Bakirhan, bang li Serokkomarê Tirkiyeyê Recep Tayyîp Erdogan kir û axaftina xwe wiha qedand: “Em bang li Serokkomar dikin; Birêz Serokkomar em qîmetê didin rola we ya ku we di Pêvajoya Aştî û Civaka Demokratîk de lîstiye. Birêz Bahçelî bi wêrekiyeke mezin pêşiya pêvajoyê vekir. Birêz Ocalan bi banga Aştî û Civaka Demokratîk deriyê çareseriyê heta dawiyê vekir. Birêz Ozel, Babacan, Davutoglu û Erbakan jî piştgiriya pêvajoyê kirin. Birêz Serokkomar, aştî niha li benda lêdana mohrê ye. Wekî desthilat, berpirsyarî ya we ye. Mohr di destê we de ye. Gel amade ye. Niha dema avakirina aştiyê ye. Bila ev meclîs bibe meclîsa aştiyê û bila 23’yê Nîsanê bibe cejna ji nû ve avakirinê.”
