Daxuyaniya nivîskî ya Konseya Rêveber a KNK’ê bi vî rengî ye:
“Împaratoriya Osmanî û hevkarên wan di sala 1915’an de, li dijî gelên xwecihî yên Mesîhî (Xiristiyan) ku li cografyaya Mezopotamya û Anatoliya dijîn, qirkirinek mezin pêk anî. Hejmareke bilind a Kurdên Êzidî jî bi ber vê jenosîda wan ketin. Di vê qirkirine da rêvebirên Cemiyeta Îttihat Terakî, çeteyên Teşkîlata Mexsûsa, Alayên Hemîdiyê û Artêşa Osmanî, efserên (sûbayên) di Artêşa Osmanî da kar dikirin, li hemberê mirovahiyê sûc kirin. Gelê Ermenî û Asûrî-Suryanî-Kildanî, bi armanca ku bi dîrok û çanda wan ve ji holê rakin, qir kirin. Ev qirkirin li dijî mirovahiyê sûcek e ku ne mimkun e bête înkarkirin. Belgeya berçav û heqîqî hejmara kuştina ji milyonek û nîvan zêdetir mirovan e. Qeydên nifûsa Împaratoriya Osmaniyan jî vê rastiyê teyîd dikin.
Ji gelê Asûrî-Suryanî-Kildanî zêdetir ji nîv milyonê, ji gelê Ermenî jî di ser milyonekê mirov bi barbarî û bi rengên cuda û li cihên cuda hatin kuştin. Bi sed hezaran kes jî, ji cih û warên wan, bi Qanûna Tehcîrê hatin sirgunkirin. Bi deh hezaran, piranî zarokên keç û jinên ciwan, bi zorê kirin misilman û bi awayekî dermirovî bi zorê hatin zewicandin. Bi hezaran warên bicihbûnê, dêr û manastir, dibistan û pirtûkxane, kargeh hatin wêrankirin. Hejmareke ne diyar mal, milk û dewlemendî hatin desteserkirin û xespkirin. Kuştin û birandina gelên Asûrî-Suryanî-Kildanî û Ermenî û wêrankirina wargeh û şopên çandî û dîrokî yên wan rewa hate dîtin; bi bangên cîhadê û bi fermanan paksaziya etnîk û dînî hate kirin.
Împaratoriya Osmanî, axa Mezopotamya û Anatoliya dagir kir û bi sedsalan talan kir û di sala 1915’an de jî ev gel qir kirin ku ji vê birîna jenosîdê hêj jî xwîn tê. Ev travmaya ku bi serê van xelkan hatî eve 111 sal in li ser nifşên nû bûye trajedî ku bi bîrhatinên gelek tahl ve tijî ye. Piştî jenosîda ku 111 sal ji ser ra derbaz bûyî, eger Komara Tirkiyeyê ku mîratxwera Împaratoriya Osmaniyan e, vê qirkirinê qebûl neke hingê dibe şirîkê vî sûcî ku ev tê wateya bi awayekî din domandina jenosîdê. Bi munasebeta 111’emîn sala jenosîdê em bang li Komara Tirkiyeyê dikin ku qirkirinê qebûl bike û pêdiviyên wê jî bîne cih.
Em wek KNK, jenosîda sala 1915’an careke din bi tundî şermezar dikin û daxwaz dikin ku ji aliyê tevahiya dem û dezgehên peywendîdar ve bê qebûlkirin.”
