Piştî ku Rêber Apo di 27’ê Sibata 2025’an de “Banga Aştî û Civaka Demokratîk” kir, pêvajoya diyalogê dewam dike. Bi vê bangê re PKK’ê çek danî û xwe fesix kir. Ji bo çareseriya pirsgirêkan bi rêya destûra bingehînî li Meclîsê komîsyonek hate avakirin ku li gelek saziyan guhdarî kir. Li gel dewamiya nîqaşên li ser hevdîtinan û garantiya destûra bingehîn, li Kurdistanê bi hinceta “ewlekariyê” mafên mirovan têne binpêkirin.
Beriya destpêkirina pêvajoyê bi heman hincetê li derdorên bejahî û çiyayê, li hewşa malan û li nava gelek gundan kamera hatin bicihkirin. Li gel daxwaza gundiyan jî ev cîhaz nehatin rakirin û di vê pêvajoyê de jî li gundên bejahî yên Licê û Pasûrê bi dewamî têne bicihkirin.
Xefika wêne û kamerayên bi hinceta “ewlekariyê” destpêkê li qadên çiyayî hatin bicihkirin, piştî demeke kurt li nava gundan jî hatin bicihkirin. Kamerayên li pêşiya gund, li dîrekên li navenda gund û bexçeyên gundiyan hatin bicihkirin, mafê jiyanê yê gundiyan binpê dike. Her wiha bêyî agahî ji keyayên gund re bê dayin kamera hatin bicihkirin.
Li aliyê din, li kesên ku zerarê didin kamerayan cezayê pere tê birîn. Ev pêkanîn bi taybetî li gundên çiyayî yên Licê bi rêk û pêk bûye. Gundî dibêjin ev kamerayên li bexçe û li pêşiya malên wan jiyana wan tengav dikin û diyar dikin ku li gel pêvajoyê jî heman kiryar dewam dikke.
‘DIVÊ KAMERA BÊNE KOMKIRIN’
Gundiyên ku li ser mijarê axivîn, anîn ziman ku bi taybetî li gundên çiyayî vî karî hefteya derbasbûyî jî dewam kir. Gundiyan ragihandin ku kesên bi wesayitên sivîl hatin gundê wan ev kamera bi cih kirin û li gel nerazîbûna wan jî ev kar dewam kirin.
Ji şêniyekî Licê ku şahidî ji mijarê re kir, got “Beriya çend rojan min dît ku wesayitek li nêzî gundê me sekinî. Qet bi wan re neaxivîm û di ber wan re derbas bûm. Piştre wan bi xwe li halê min pirsîn. Dûre li ser pêvajoyê axivîn û gotin, ‘Eger pirsgirêkek rû bide, bê gel me’. Dema ku ez ji gel wan çûm, karê bicihkirina kamerayê dewam kirin.
Par ev rewş hîn zêde bû. Bi taybetî li aliyê Peçarê li her gundî kamera hebû. Li cihê ku pêşiya gund û bexçeyan dibîne, kamera hatin bicihkirin. Li ser malên li pêşiya gund jî bi cih kiribûn. Niha bi heman rengî li ser rêyan bi cih dikin. Xefika kişandina wêneyan ji xwe li her derê hene. Dema ku zerar li van cîhazan dibe şivanan sûcdar dikin.
Bi vê pêvajoyê re belê zext kêm bû, lê belê em dixwazin dawî li vî karî jî bê anîn. Em dixwazin li mal û gundê xwe rehet bin; em naxwazin rojê 24 saetan bêne şopandin. Divê kamerayên li gundan bêne komkirin.”
