Hevgirtina Jinên Ewropayê (AKD) banga beşdarbûna Greva Jinan a ku wê di 14’ê Hezîranê de li Swîsreyê bê lidarxistin û çalakiyên li dijî Lûtkeya G7’ê ku wê di heman rojê de werin lidarxistin, kir.
Di daxuyaniya ku ji aliyê AKD’ê ve hatiye dayîn de, bi bîrxist ku jinên karker û kedkar ên li bajarên cuda yên Swîsreyê wê ji kargeh, cihên kar û malan derkevin û li kolanan kom bibin û hat diyarkirin ku Greva Jinan ne tenê têkoşînek li dijî newekheviya mûçeyan, mobîngê û nedîtina keda malê ye, di heman demê de li dijî polîtîkayên mêtingeriyê yên ku li ser beden, ked û mafên jinan tên meşandin e.
Di daxuyaniyê de hat gotin ku têkoşîna jinên ku li Swîsreyê di grevê de ne û jinên ku li kolanên welatên G7 çalakiyan dikin hevparr in û bang li hemû jinên ku li malê, li zeviyan, li nexweşxaneyan, dibistanan, bankan, sektorên paqijiyê û hilberînê dixebitin hat kirin ku bi Greva Jinan a 14’ê Hezîranê re di nava hevgirtinê de bin. AKD’ê her wiha banga beşdarbûna çalakiyên dijî G7 bikin ku wê li Berlîn, Parîs, London û gelek bajarên din werin lidarxistin, kir.
Di daxuyaniyê de dirûşmeyên “Werin em xwe rêxistin bikin, jin, werin em bi serhildana xwe wekhevî û azadiyê ava bikin”, “Werin em destûrê nedin mêtingeriya li kargehan, malan û salonên lûtkeyan” û “Ger em dixwazin bijîn, grev û aştiyê dixwazin, em serî hildin” hatin berzkirin.
Di nava pêkhateyên Hevgirtina Jinên Ewropayê de Jina Nû, Tevgera Jinên Demokratîk a Ewropayê (TJDE), Bi Çavên Jinan, Tevgera Jinên Kurd û Yekîtiya Jinên Sosyalîst (SKB) hene.
