Xelkê Wargeha Penaberan a Şehîd Rustem Cûdî (Mexmûr) ji bo sibê Komîteya Wezîran a Konseya Ewropayê di civîna xwe de li ser ‘Mafê Hêvê’ biryarek erênî bigre û biryara xwe bixe merîyetê, meşek girseyî lidar xistin. Xelkê Mexmûrê yê ku li ber Saziya Malbatên Şehîdan a Mexmûrê kom bûn, li wir dest bi meşê kirin.
Di meşê de posterên Rêber Apo hatin bilind kirin û bê navber dirûşmeyên “Bê Serok Jiyan Nabe”, “Bijî Serok Apo” û “Bi Can Bi Xwîn, Em Bi Te Re Ne Ye Serok” hatin qêrîn.
Girseya meşê li ber Parqa Şehîd Ariyen Cûdî rawestiya û li vir daxuyaniyek hate dayîn. Daxuyanî bi deqeyek rêzgirtin ji bo tevahî şehîdên Doza Azadiya Kurdistanê destpê kir. Piştî rêzgirtinê Hevserokê Diwan Meclîsa Gel a Mexmûrê Elî Bilihî axivî.
Elî Bilihî di destpêka axaftina xwe de balkişand li ser qanûna navnetewî ya mafê hêviyê û wiha got: “Di qanûna navnetewî de girtiyên ku 25 salên xwe yên girtîgehê diqetînin ‘Mafê Hêviyê’ ji bo wan tê nasîn. Hemû girtî ji vî mafî dikare sud werdigirin. Ji maf zêdetir di roja îro de pêwîstiyek ya serdemê ye ku Rêbertî ji vî mafî sud bigire û ji bo pêvajoyê bibe bersiv, pêwîstiyeke nebe nabe ye. Divê Dadgeha Mafê Mirovan vê biryara xwe li ser dewleta Tirk bisepîne û li gorî wê jî dewleta Tik gavên pêwîst biavêje. Ne tenê Rêbertî divê hemû girtiyên siyasî yên li Tikiye ji mafê hêviyê sud werbigirin. Gelek caran Komîteya Wezîran a Konseya Ewropayê li ser vê biryarê civiyan lê heta niha tiştek ne kirine. Em di wê baweriyê de wê di civîna ku were li darxistin de edalet cihê xwe bibîne. Em wek civak Mexmûrê jî bang li Komîteya Wezîran a Konseya Ewropayê dikin ku li erk û berpisyatiyên xwe xwedî derbikevin.”
Daxuyanî bi dirûşmeyên “Bê Serok Jiyan Nabe”, “Bijî Serok Apo” û “Bi Can Bi Xwîn, Em Bi Te Re Ne Ye Serok” bi dawî bû.
