Bi daxwaza azadiya Rêber Apo di asta navneteweyî de kampanya û hewldan dewam dikin. Di civînên Komîteya Wezîran a Konseya Ewropayê de ku 9’ê Hezîranê destpê kir û wê heta 12’ê Hezîranê dewam bike, tê payin ku meseleya ‘mafê hêviyê’ ya têkildarî Rêber Apo careke din bikeve rojevê. Siyasetmedarên Kurd jî dibêjin, gava ku komîte di vê mijarê de biavêje, ji bo paşeroja pêvajoya aştî û civaka demokratîk a ji bo çareseriya pirsgirêka Kurd gelekî girîng e.
‘BICIHANÎNA MAFÊ HÊVIYÊ PÊWÎSTIYEKE BINGEHÎN E’
Siyasetmedarê Kurd Nejdet Atalay ku li ser mijarê ji ANF’ê re axivî, anî ziman ku nîqaşên li ser “mafê hêviyê” ne tenê meseleyeke hiqûqî ye, di heman demê de ji aliyê lêgerînên aştiya mayinde û çareseriya demokratîk ve xwedî wesfeke diyarker e.
Atalay ragihand ku “mafê hêviyê” ji bo her kesî mafekî bingehîn û gerdûnî ye û got, “Nayê qebûlkirin ku ti pêkanîn an jî ceza bêdawî be. Divê dawiya her tiştekî hebe.
Lewma ne tenê ji bo Birêz Ocalan û Kurdan, ji bo tevahiya Tirkiyeyê jî bicihanîna mafê hêviyê pêwîstiyeke bingehîn e. Yanî mecbûriyeteke hiqûqî ye. Ev pêwîstî ji xwe di rojeva Konseya Ewropayê, Parlamenta Ewropayê û Dadgeha Mafên Mirovan a Ewropayê de ye. Di vê çarçoveyê de hin biryar hatine dayin ku divê Tirkiye sererastkirinê bike.”
‘MAFEKÎ JI BO HER KESÎ’
Atalay daxuyaniya siyasetmedarên Kurd ên li dîasporayê ya 9’ê Hezîranê li ber Konseya Ewropayê bi bîr xist û axaftina xwe bi vî rengî dewam kir: “Daxuyaniya ku me li vir da, beriya her tiştî ji bo bersivdayina li vê pêwîstiya hiqûqî bû. Lê belê ev rewş bi rengekî paralel li gel şexsê Birêz Ocalan û hemû girtiyên siyasî yên Kurd, rewşeke welê ye ku her kesên ku cezayê girtîgehê yê heta bi hetayê yê girankirî lê hatiye birîn eleqedar dike.”
‘PÊVAJOYA AZADIYA BIRÊZ OCALAN FERZ DIKE’
Siyasetmedarê Kurd Atalay anî ziman ku bicihanîna mafê hêviyê ya ji bo Rêber Apo, ji aliyê paşeroja lêgerînên çareseriya demokratîk a pirsgirêka Kurd di asta dîrokî de girîng e û got, “Têkildarî çareseriya pirsgirêka Kurd di n avbera Birêz Ocalan û dewleta Tirk de hevdîtinên dîrokî têne meşandin. Lewma ji bo dewamiya vê pêvajoyê, afirandina dilxwaziya civakê, tevlîbûna wê gelekî girîng e. Ji ber vê jî divê ji aliyê hiqûqî û siyasî ve gav bêne avêtin.
Her wiha nuqteya ku pêvajo gihîştiye, ferz dike ku mercên fîzîkî yên Birêz Ocalan bêne guhertin û ev yek êdî pêwîstiyek e. Di çarçoveya pêvajoyê de divê Birêz Ocalan karibe têkiliyê bi civakê re dîne. Ji bo karibe rola xwe bi rengekî çalak bi cih bîne divê merc jê re bêne afirandin ku karibe hevdîtinê bi siyasetmedar, rojnamevan, zanyar û beşên cuda yên civakê re hevdîtinan bike. Van hemûyan nikare di nava mercên Îmraliyê de pêk bîne. Lewma divê sererastkirina hiqûqî bê kirin, mafê hêviyê bê garantîkirin û li ser vê bingehê jî azadiya fîzîkî ya Birêz Ocalan bê pêkanîn.”
‘HETA KU BERSIV JI DAXWAZÊN ME RE BÊ DAYIN WÊ TÊKOŞÎN DEWAM BIKE’
Atalay destnîşan kir ku azadiya fîzîkî ya Rêber Apo wê tevkariyê li wê yekê bike ku pêvajo li nava civakê kûrtir bibe, dilxwaziya aliyê Kurd a ji bo pêvajoyê xurtir bibe û got, “Nêzîkbûna li hev a Kurdan û dewleta Tirk, îhtimala aştiyê wê tevkariyeke mezin li demokrasiya Tirkiyeyê û Rojhilata Navîn bike. Azadiya Birêz Ocalan wê tevkariyê li çareseriya şerê li Rojhilata Navîn bike. Ji ber vê yekê naskirina mafê hêviyê ne tenê meseleyeke ku şexsê Birêz Ocalan eleqedar dike, di heman demê de meseleyeke ku wê tevkariyê li aştiya herêmî, mirovî û hiqûqî bike. Em hêvî dikin ku Ewropa û saziyên pêwendîdar wê di vê mijarê de bi berpirsyariyê rabin. Heta ku bersiv jê re bê dayin em ê têkoşîna xwe dewam bikin.”
