Ajansa Mîzanê ya ser bi desthilata dadweriya rejîma Îranê, eşkere kir ku xwepêşanderê bi navê Mehdî Xankî ku roja 10’ê Sibata îsal (2026) li Kerecê hatibû girtin, vê sibehê hat bidarvekirin.
Bidarvekirina Mehdî Xankî di demek de ye ku heta niha jî ti agahiyek fermî têkildarî dem û çawaniya dadgehkirina wî bi raya giştî re nehatiya parvekirin.
Li aliyê din li gor daxuyaniyek ya Rêxistina Mafên Mirovan a Îranê, 16 xwepêşanderên girtî bi awayek veşartî li girtîgeha Esfehanê de hatine dadgehkirin.
Her wiha hatiye diyarkirin ku her 16 xwepêşander bi tometa ‘muharebe’ (şerê li dijî xwedê û dewletê) hatine tawanbarkirin. Li gor yasayên rejîma Îranê jî cezayê vî tawanî bidarvekirin e. Hatiye diyarkirin ku di dema lêpirsînê de îşkenceyek giran li wan girtiyan hatiye kirin.
Rêxistinên mafên mirovan hişyariya zêdebûna darvekirinên ku bi awayek bêdeng ji aliyê desthilatê ve tên kirin didin û diyar dikin ku ev darvekirin ji bo tirsandin û bêdengkirina civakê tên kirin. Tê gotin ku niha metirsiya darvekirinê li ser bi dehan ciwanên din ên girtî heye.
