Li Parka Azadî ya bajarê Silemaniyê Komîteya “Ji Ocalan re Azadî” bi armanca cîbicîkirina mafê hêviyê ji bo Rêber Apo daxuyaniyek da çapemeniyê û di daxuyaniyê de komîteyê daxwazên xwe arasteyî raya giştî ya cîhanê û Dadgeha Mafên Mirovan ya Ewropayê kir.
‘LI ROJHILATA NAVÎN DENGEKÎ NÛ BILIND BÛ’
Daxuyaniya nivîskî ku ji aliyê Endamê Komîteya “Ji Ocalan re Azadî” Newroz Fazil ve hate xwendin wiha ye;
“Balyozê Monakoyê li Konseya Ewropayê Birêz Gabriel Revel, Serokê Komîteya Wezîran a Konseya Ewropayê, wekî ku hûn jî jê agahdarin, şerekî wêranker tevahiya Rojhilata Navîn bixwe girtiye. Şer encamên giran yên aborî û siyasî bi xwe re aniye û têkiliyên civakî yên li herêmê bi giranî têk biriye. Hinek hêzên herêmî û cîhanî niha bi navê çareserkirina nakokiyan ji bo şerên din amadekariyê dikin.
‘BANGA AŞTÎ Û CIVAKA DEMOKRATÎK BANDOREKÎ ERÊNÎ ÇÊKIR’
Di rewşek wisa de, li Rojhilata Navîn dengekî nû derketiye holê ku daxwaza çareseriyeke aştiyane û bê tundûtûjî ji bo pirsgirêkan dike. Ev deng di banga ‘Aştî û Civaka Demokratîk’ de deng veda. Ew projeya Rêberê Gelê Kurd Abdullah Ocalan’e û vîzyonek nû ji bo çareserkirina nakokiyên li Rojhilata Navîn pêşkêş dike. Banga ‘Aştî û Civaka Demokratîk’ ku di 27’ê Sibatê de hatibû ragihandin, heta niha bandorek pir erênî li ser herêmê kiriye, piştî vê yekê PKK’ê demildest agirbest ragihand. Piştre biryara hilweşandina rêxistinê, dev ji stratejiya têkoşîna çekdarî berdan, şewitandina çekan û vekişîna hêzên gerîla ji Tirkiyeyê hat dayîn.
Bi avêtina van gavan, dijminatî li Tirkiye, bakurê Sûriye û bakurê Iraqê rawestiya û Tirkiye bûye yek ji wan welatên herêmê ku rasterast beşdarî şerê herêmê nebûye. Ocalan her wiha peyamek ji hemû aliyên peywendîdar re şand û girîngiya kêmkirina aloziyan û çareseriyeke siyasî ji bo bidestxistina aştiyeke mayînde tekez kir.
‘RAYEDARÊN KURD PIŞTGIRÎ DAN BANGA OCALAN’
Herêma Kurdistana Iraqê di salên dawî de herî zêde êş kişandiye, bi sedan sivîl di êrişên hewayî û bejahî yên Tirkiyeyê de hatine kuştin. Banga Rêberê Gelê Kurd Abdullah Ocalan ji bo bidawîanîna dijminatiyê li Herêma Kurdistanê ji aliyê rayedarên Kurd ve hatiye piştgirîkirin û raya giştî jî hatiye wergirtin.
Tevî rewşa dijwar a herêmê, Abdullah Ocalan di sala borî de bi berdewamî nîşan daye ku ew ji bo guhertina taktîkan û avêtina gavên pratîkî pabende. Di salvegera banga xwe ya di sala 2026’an de, wî careke din daxuyaniyek da û pabendbûna xwe ya ji bo aştî û demokratîkbûna Komara Tirkiyeyê piştrast kir. Di encama van hewldanan de, bi sedan sazî û kesayetên navneteweyî, di nav de 88 xwediyên Xelata Nobelê, sala borî piştgiriya xwe ji bo hewldanên Ocalan yên ji bo pêşvebirina jiyana hevbeş di navbera netewan de nîşan dan.
‘ŞERT Û MERCÊN LI ÎMRALIYÊ NEHATIN GUHERTIN’
Mixabin, derfeta Abdullah Ocalan a beşdarbûna çalak di pêvajoya aştiyê de ji ber girtina wî li Girava Îmraliyê hatiye sînordarkirin. Şert û mercên girtîgehê yên wî neguherîne û têkiliyên wî bi cîhana derve re hîn jî bi biryarên siyasî yên rayedarên Tirkiyeyê ve girêdayî ne.”
Di dewama daxuyaniyê de ev tişt hate gotin: “Sibata 2026’an de Komîyona Têkiliyan rapora dawî ya xwe belav kiribû. Di raporê de bal hatibû kişandina ser girîngiya bicihanîna hemû biryarên Dadgeha Mafê Mirovan a Ewropayê û Dadgeha Destûra Bingehîn a Tirkiye dike. Her wiha pêşniyara xurtkirina mekanîzmeya berdest dike. Berdewambûna nêzîkatiya dijterorê weke çarçoveyeke serekî, hê jî astengiyeke li pêşiya nîqaş û aştiya rasteqîn. Dîsa di raporê de qala wê yekê dike ku hikûmeta Tirkiye tenê têbîniyên komîteya Wezîran a Meclisa Ewropayê di Îlona sala borî de girtine, lê hê jî ti gav pratîkî ji bo bicihanînê neavêtiye.”
Di dawiyê de ev tişt hate gotin: “Em partiyên siyasî yên Kurd û saziyên civaka sivîl li Herêma Kurdistanê daxwaz ji Komîteya Wezîran a Konseya Ewropayê dikin ku bicihanîna biryara sala 2014’an a Dadgeha Mafê Mirova a Ewropayê ya têkildarî doza Abdullah Ocalan piştrast bikin û Mafê Hêvî binasin. Bang azadbûna Abdullah Ocalan dikîn û avakirina şert û mercên temam a bê sînor ji bo bikare bi awayeke aktîf di qonaxên bê ya aştiyê de kar bike.”
