Xwendekarên bajarê Kobanê di roja destpêkê ya dewamiya sala xwendinê de nerazîbûn nîşanî biryarnameya Wezareta Perwerdeyê ya hikumeta demkî ya Şamê dan, ku xwendina bi zimanê dayikê tenê bi sê dersên nava hefteyê sînordar dike. Xwendekaran li pêşiya dibistanan xwe bi pirtûkên zanistî yên Kurdî bersiv dan Wezareta Perwerdeyê ya Sûriyeyê û neketin dersan.
Xwendekarên Kobanê li ser mijarê ji ANF’ê re axivîn û bi bîr xistin ku ew Kurd in, lewma zimanê wan ê xwendinê jî Kurdî ye.
Xwendekara refa 11’an a dibistana Şehîd Hogir, Xeyriya Xelîl got, “Zimanê me Kurdî ye û ew nasname û hebûna me ye. Ji bilî wî zimanî em ti zimanên din napejirînin. Bila li herêmên Kurdan li dewsa sê wan e bi Kurdî be, bila bi Erebî be. Mafê me ye ku em bi zimanê xwe bixwînin. Bi zimanê xwe em hebûn, nasname û çanda xwe nas dikin û em ê bi zimanê xwe bi ser bikevin.”
Xwendekar Kemal Xelîl jî anî ziman ku wî heta refa xwe ya 11 Kurdî xwendiye û got: “Em vê biryarê red dikin û gelê me jî giştî red kir. Em zimanê Erebî naxwînin û tenê em zimanê xwe yê Kurdî dixwazin bixwînin. Zimanê me Kurdî ye û ji mafê me yê rewa ye ku em bi zimanê xwe bixwînin. Kes nikare zimanekî din li me ferz bike.”
Xwendekara refa 5’an Rewandoz Xelîl diyar kir ku heta refên wan ne bi zimanê Kurdî be ew ê nekevin refên dibistanê û got, “Çar sal in ez bi Kurdî dixwînim, ez naxwazim bi Erebî be. Wê ji bo min gelekî zehmet be.”
Hêjayî bi bîrxistinê ye ku xwendekar li pêşiya dibistanê sekinî ne û derbasî refên xwe nabin. Xwendekar li benda guhertina biryarê ne û dibêjin ku ew Kurd in ne Ereb in ku bi zimanê Erebî bixwînin. Li hemû dibistanên li bajarê Kobanê û gundên girêdayî wê, xwendekar weke protestokirinê li hemberî biryara Wezareta Perwerdeyê rabûn.
