Di 27’ê Tebaxê de ji aliyê Wezareta Perwerdeyê ya Sûriyeyê ve biryar hatibû ragihandin ku perwerdeya bi zimanê Kurdî bi sê dersan hatiye sînordarkirin. Ev yek bû sedema hêrs û nerazîbûnên tund li seranserî Rojavayê Kurdistanê. Bi dehhezaran xwendekar bi çalakiyên cuda cuda biryarname protesto kirin û li gelek navendan jî xwendin hat boykotkirin.
Li bajarê Kobanê jî îro li dibistana şehîd Osman xwendekaran biryar dan ku êdî naçin dewamê û biryara wezareta perwerdeyê red kirin. Xwendekaran li wir deriyê dibistana xwe zincîr kirin û sirûda Ey Reqîb xwendin. Piştî wê xwendekar ji ANF’ê re axivîn û gotin, ew ne Erebin ku bi Erebî bixwînin, ew Kurdin û ew ê bi Kurdî bixwînin.
Xwendekara bi navê Exlas ku diçe Refa 9’an got, “Bi salên dûr û dirêje em bi zimanê xwe dixwînin, em bi hezaran xwendekar wê biryarê red dikin û em niha deriyê xwe zîncîr dikin û em naçin.”
Xwendekara bi navê Tolîn Mihemed Berkel ku tîpên Kurdî xwendin û piştî wê jî got, ew Kurd e ne Ereb e û biryara Wezareta Perwerdeyê red kir.
Xwendekarê bi navê Serwat Bozî got, “Me deriyê xwe yê dibistanê girt û heta ku zimanê me nebe zimanê perwerdeya bi giştî, em naçin dibistanan. Em Erebî nizanin û li şûna Kurdîtiya xwe em tu zimanên din nizanin. Niha biryare ji bo me em deriyê dibstana xwe digirin.”
Xwendekarên bi navê Şiyar Şêx Elî û Mêral Ehmed ku dibêjin ew dibistanên xwe bi zimanê xwe dixwazin û ew ê tenê bi zimanê xwe bigihêjin hêviyên xwe.
