Li Êlihê Komeleya Yekitî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER), bernameya bîranînê ya ku ji bo şehîdên têkoşîna azadiya Kurd ku di dîrokên cuda de jiyana xwe ji dest dane li Taxa 19’ê Gulanê ya Navenda Êlihê dihat lidarxistin, di roja xwe ya duyemîn de berdewam dike.
Beriya bîranînê ya ku nûnerên partiyên siyasî û rêxistinên civakî ligel bi hezaran welatiyan beşdar bûn, meşek hat lidarxistin. Di meşê de girseyê dirûşmên “Bijî Serok Apo” û “Rêya şehîd rêya me ye, PKK partiya me ye” berz kirin.
BEDLÎS
Li Bedlîsê bîranîna ku bi pêşengiya MEBYA-DER’ê tê lidarxistin, serê sibehê bi dirûşman destpê kir. Malbatên şehîdan, nûnerên partiyên siyasî û rêxistinên civakî jî di nav de gelek kes beşdarî bîranînê bûn. Li salonê ku wêneyên Rêber Apo hate hildan û wêneyên şehîdan bi rengên kesk, sor û zer hate xemilandin, pankartên bi nivîsa “Şehîdên me rûmeta me ne”, “Şehîd ronahiya rêya me ne” û “Şehîd namirin” hate daliqandin.
Piştî deqeyeke rêzgirtinê tim û tim dirûşmên “Şehîd namirin” û “Bijî Serok Apo” hatin qîrîn. Bîranîn bi serdanan dewam dike.
COLEMÊRG
Bîranîna şehîdên Tevgera Azadiya Kurdistanê ya li Colemêrgê di roja duyemîn de bi serdanên girseyî didome. Bîranîn li Eywana Dogu Palacê ya li taxa Baglarê ya li navenda Colemêrgê di roja duyemîn de bi tevlibûna bi hezaran kesan dewam dike. Di bîranînê de li ser giyanê şehîdan dia hatin xwendin. Gelek peyamên sersaxiyê yên li derveyî welat, Fransa, Engiltere, Belçîka hatine, hatin xwendin. Dayîkên Aştiyê yên Geverê û malbatên şehîdan yên Çelê jî tev li bîranînê bûn. Bîranîn wê îro di saet 18:00an de bi dawî bibe.
AGIRÎ
Li navçeyên Bazîd û Panosê yên Agiriyê, ji bo şehîdan bîranîn hate lidarxistin. Li Bazîdê li Mala Şînê ya Mudur Aras, li Panosê jî li mala taziyeyê ya goristanê bîranîn hate lidarxistin. Malbatên şehîdan, Hevseroka DEM Partiyê Tulay Hatîmogûllari û nûnerên rêxistinên civakî yên sivîl tevlî bîranînê bûn.
ÎDIR
Li Îdirê bi pêşengiya MEBYA-DER’ê bîranîna şehîdan li mala sersaxiyê ya li taxa Ozgur di roja duyemîn de dewam dike. Girseyên gel serdana bîranînê dikin. Li bîranînê dirûşma “Şehîd namirin” hate qîrîn.
