Agirê Jiyan ku bi girseyîbûna Tevgera Azadiyê ya Kurd re di salên 1990’î de li nava hişê civakî bû xwedî cihekî taybet, piştî demeke dirêj careke din derkete ser dikê. Komê li Capitol Theater a li bajarê Dusseldorf ê Elmanyayê konserek lidar xist. Salon bi temamî tijî bû û hezkiriyên komê bi hev re stranên komê gotin.
Konser ji aliyê Art Recordsê ve hate amadekirin û hunermendên TEV-ÇAND’ê jî tevlî konserê bûn, bi vî rengî piştgirî dan komê. Komê bi stranên xwe yên ji salên 1990’î mirovên ji her temenî gihand hev û atmosfereke bi coş afirand.
Solîstê Agirê Jiyan Alî Geçîmlî piştî konserê hestên xwe anî ziman: “Ji bo me kelecaneke mezin bû ku piştî bi salan careke din derketin pêşberî temaşevanan. Her wiha ji bo me cihê serbilindiyê ye ku ji 7 heta 70’ê salî mirovên ji her temenî li vir amade bûn. Bi taybetî bala ciwanan a li ser muzîka me, em gelekî kêfxweş kir. Ev ciwan nirxên me ne. Heta ku stranên Agirê Jiyan bêne guhdarîkirin wê konserên me jî dewam bikin. Weke kom em ê bi stranên nû jî derkevin pêşberî guhdarên xwe.”
Solîstekî din ê komê Ahmed Tabar jî got, “Em hemû gelekî bi coş û kelecan in. Ev kelecana me li ser dikê jî hate dîtin. Em kêmasiyên biçûk jî dikin. Piştî ewqas salan kombûna me ya li hev cihê kêfxweşiyê û rûmetê ye. Gelê me, em bi tenê nehişt, spasiya her yekî ji wan dikim. Hêvîdar im em ê di konserên din de jî bigihêjin hev. Li deverên cuda yên Elmanyayê wê konserên me dewam bikin. Lê belê ya ku em bi esasî dixwazin bikin ew e ku vegerin welat û li bajarên cuda bi gelê xwe re jinûve bigihêjin hev.”
Solîst Şener Yildiz jî bal kişand ser jinûve zindîkirina ruhê salên 1990’î û got, “22 salan em ji hev cuda bûbûn, 10 sal in Agirê Jiyan dernediket ser dikê. Îro yekemcar li Dusseldorfê bi kelecan û coşeke mezin bi beşdariya girseyeke bedew em bûn yek dil. Bi piştgiriya gelê me ev rêwîtî wê dewam bike. Bêguman karên me yên şexsî jî wê hebin, lê belê hêviya me ya herî mezin ew ku vî ruhî bigihînin nifşên nû. Bila ji ciwanan re diyarî be.”
