Di çarçoveya “Kampanyaya Azadiyê” ya ji bo girtiyê siyasî Şerîfe Muhemmedî tê meşandin Şaxa Rêxistina Efû ya Navnetewî ya Awûstûryayê daxuyaniyek weşand.
Li gorî kampanyayê Şaxa Rêxistina Efûya Navneteweyî (AMNESTY) ya li Awûstûryayê, çalakiyên Şerîfe Muhammedî weke çalakiyên aştiyane binav pênase kir û gotiye; “Çalakiyên wê ne sûc in, hemû jî ji bo mafê jinan û karkeran in. Lê niha ew rûbirûyê gefa darvekirinê ye.”
Kampanyayê, ragihand ku Rêxistina Efûyê bang li civaka navneteweyî kiriye da ku ji bo hilweşandina cezayê darvekirinê yê Şerîfe Muhammedî îmzeyan kom bikin û helwesta xwe nîşan bidin.
Kampanyayê, da zanîn ku rêxistinê xwestiye di zûtirîn demê de cezayê Şerîfe were rakirin û bê şert û merc bê berdan.
Di 5’ê Kanûna 2023’yan de Şerîfe Muhammedî li mala xwe ya li bajarê Reşt ji aliyê hêzên ser bi wezareta Îtlaetê (îstixbarat) ve bêy fermana dadwer hate binçavkirin. Şerîfe Muhammedî şandin girtîgeha bajarê Sine yê Rojhilatê Kurdistanê. Li wir kirin hucreya takekesî û di dema lêpirsînê de êşkenceya fîzîkî û derûnî lê hat kirin. Destûr nehat dayîn ku li gel malbat û parêzerên xwe hevdîtin bike, piştre jî ji bo girtîgeha Lakan a bajarê Reşt hat veguhestin.
Doza Şerîfe Muhammedî ji aliyê şaxa yekem ya Dadgeha Şoreşê ya Reştê ve bi serokatiya Dadwer Mihemed Elî Derwêş Goftar ve hate lêkolînkirin. Di 4’ê Tîrmeha 2024’an de bi tometa (derketina dijî desthilatê) cezayê darvekirinê lê hat birîn. Di 16’ê Tebaxa 2025’an de jî ev ceza ji aliyê şaxa 39 ya Dadgeha Bilind ya Îranê ve bi temamî hate erêkirin.
