Endama Koordînasyona Meclîsa Îştar a Wargeha Penaberan a Şehîd Rustem Cûdî (Mexmûr) Qîmet Nerexî têkildarî girîngî û wateya 8’ê Adarê ango roja têkoşîna li hemberî tundûtîjiya li ser jinan ji ANF’ê re axivî.
‘8’Ê ADARÊ BI XEMGÎNÎ HATIYE DESTPÊKIRIN’
Qîmet Nerexî di serî de 8’ê Adarê li Rêber Apo, jinên têkoşer û giştî jinên cîhanê yên ku azadiya xwe di azadiya Rêbertî de dibînin pîroz kir û got: “Dema em li dîroka 8’ê Adarê dinêrin, em dibînin ku serpêhatiya 8’ê Adarê bi xemgînî hatiye destpêkirin. Ji ber ku yên ked didin, civak û jiyan dafirînin jin in, ji bo ku bikaribin berhemên keda xwe bigirin di kargehekê de kar dikirin. Bê mafiya ku di wê kargehê de dihat kirin û destheqên wan li gor tê xwestin nedayîna wan, bû sedem ku jin li ber xwe bidin. Lê mixabin katîlê kastîk yê wê demê heyî xwe li ber têkoşîna jinan negirt, li wêderê bi sedan jin bi şiklekî hovane hatin qetilkirin. Wek me li jor jî dayî diyarkirin, her çiqas ev roj bi xemgînî hatibe destpêkirin jî, jinên têkoşer û berxwedêr ev roj ji bo me vegerandin roja azadî û têkoşîna xwe xurtkirinê.”
‘DIVÊ EM DI FERQA XWE DE BIN’
Di berdewama axaftinên xwe de Qîmet anî ziman ku dema ew wek jinên Kurd roja 8’ê Adarê binirxînin, her çiqas ev roj ji aliyê jinên biyanî ve hatibe destpêkirin jî lê berxwedan û têkoşîna ku wan dayî meşandin ji jinên Kurd re jî bûye hêz û wiha pêde çû: “Dema em li roja îro jî temaşe dikin, em dibînin ku jinên Kurd her tim bi tunekirin, tundûtîjî û qirkirinê re rû bi rû dîmînin. Niha em wek jinên Kurd xwedî şansekî pir mezin in ku Rêbertiyek wisa em ji xewa mirinê şiyar kirine. Di heman demê de li me daye fêhmkirin ku em jî hene, xwedî maf in û pêwîste li xwebûna xwe xwedî derbikevin. Her wiha paradîgmaya ku Rêbertî ji bo me afirandî, ji bo pêşketina jinê rolek sereke dide jinê jî. Rêbertî dibêje, ‘eger jin azad nebe civak jî azad nabe.’ Di nameya xwe ya 8’ê Adarê ya herî dawî ji bo jinan şandî de jî balê dikişîne ser ku eger jin azad nebe bi ti şêweyî em nikarin civaka demokratîk û aştiyê jî mîsoger bikin. Ji ber wê pêwîste wek jin em çiqasî bikaribin xwedî li xwe derbikevin, ev erk û mîsyona ku Rêbertî dayî me ku dibêje, wê sedsala 21’an bibe sedsala jinan. Em ê di pêşengtiya jinan de aştî û civaka demokratîk pêkbînin.”
‘EM PÊVAJOYÊ BAŞ BIXWÎNIN’
Endama Koordînasyona Meclîsa Îştar Qîmet Nerexî bi van gotinan dawî li axaftinên xwe tîne: “Niha herî zêde Rêbertî balê dikişîne ser jiyana komînal û civaka komînal. Ji ber ku komên destpêkê yên mirovan, jinê afirandiye û li derdora jinê kom bûye. Ji bo vê jî eger jin pêşengtiyê ji vê pergala ku Rêbertî niha dixwaze bide rûniştkandin re neke, li gorî tê xwestin wê nikaribe encamekê jê bigire. Ji bo wê wek jin bi taybet jinên Kurd ev rol û mîsyona ku Rêbertî dayî me, em vê rola xwe bilîzin. Niha ev jinên ku ji bo azadiya xwe li ber xwe didin û li beramberî bêmafiya ku pêre rû bi rû dibin têkoşîna xwe bilind dikin ji hemûyan re bibin bersiv. Ji bo vê jî eger em îro dikaribin bi ziman û çanda xwe ya jin-dayîk ya ku bi sedsalane jiyan bikin û li derdora wê xwe kom bikin, ev bi saya keda Rêbertî ye. Li ser vî bingehî divê em di ferqa xwe de bin, her wiha rola ku di civakê de dikeve ser milê me ewe ku em pêvajoyê baş bixwînin û erkê xwe bi cih bînin.”
