Çalakiyên li dijî êrîşên çeteyên HTŞ, DAÎŞ û Tirkiyeyê yên li ser Rojava, berdewam dikin. Li gelek bajarên Kurdistan û Tirkiyeyê, gel daket kolanan, li dijî êrîşan nerazîbûn nîşan da û dirûşmeyên ji bo piştgiriya Rojavayê berz kirin.
MÊRSÎN
Platforma Ked û Demokrasiyê ya Tarsusê daxuyanî da. Di dema daxuyaniyê de ku li Qada Yarenlikê hat dayîn, pankartên “Çarenûsa Rojhilata Navîn nikare radestî emperyalîzm û tarîtiya paşverû were kirin” û “Gelê Rojava li dijî êriş û komkujiyan ne bi tenê ye” hatin hildan û her wiha gelek caran dirûşmeyên wekî “Bijî berxwedana Rojava” û “Jin, jiyan, azadî” hatin berzkirin.
Endamê Kongreya Demokratîk a Gelan (HDK) Hayati Aktop ku daxuyanî da, got ku êrişên ku ji hêla hêzên paşverû ve tên kirin ku navenda wan li Heleba Sûriyeyê ye û bermahiyên DAIŞê ne, mînaka herî zelal a polîtîkayên emperyalîzmê yên ji bo ji nû ve sêwirandina Rojhilata Navîn in û got: “Ev avanî ku ji hêla emperyalîzma DYA û Siyonîzma Îsraîlê ve tên piştgirîkirin, rasterast wekheviya gelan, sekulerîzmê û îradeya jiyana bi hev re hedef digirin.”
Aktop, bal kişand ser êrişên piştî Helebê yên li ser cihên Kurdan li Rojavayê û paşguhkirina sîstematîk a Elewî, Durzî û Xiristiyanan û got: “Tiştê ku DAIŞ’ê di demên berê de bi jinên Êzidî kir, çeteyên HTŞ’ê bi jinên Ereb û jinên Kurd dikin. Zîhniyeta ku jinan wekî xenîmeta şer dibîne, niha derbasî hikûmeta Sûriyeyê bûye. Ev rêveberiya HTŞ’ê ku mîratgirê DAIŞ’ê ye, jin û zarokan bi awayekî sîstematîk dike hedef. Komkujiyên li dijî wan tên kirin ne tesadufî ne. Armanca sereke ya van êrişan kûrkirina dijminatiya di navbera gelan de, mayîndekirina pevçûnê û ji nû ve şekildana herêmê li gorî berjewendiyên emperyalîst e. Ev nêzîkatî yek ji astengiyên herî mezin e li pêşiya jiyana wekhev a gel û baweriyên cuda.”
Aktop ku diyar kir hêzên emperyalîst armanc dikin ku li Rojhilata Navînê parçekirinek nû û ji nû ve sêwirandinek bikin û got: “Eşkere ye ku bermahiyên DAIŞ, El Qaîde û El Nûsra, digel hêzên din ên cîhadîst ku berpirsiyarê gelek êrişên li welatê me ne, di nav de Komkujiya 10’ê Cotmehê ya Enqerê, Pirsûs, Balafirgeha Ataturk û Yalova, ne tenê ji bo Sûriyeyê, lê ji bo tevahiya herêmê gefek cidî û mayînde ne. Di dîrokê de, bîrdoziyên siyasî yên cîhadîst ên dij-laîk li Rojhilata Navînê tenê bi xwîn û hêstiran encam dane. Çarenûsa gelên Rojhilata Navînê nikare radestî tarîtiya reaksiyoner were kirin. Pêşerojek ku gel dikarin bi azadî, wekhevî û bi mirovî bijîn tenê bi bidawîbûna destwerdanên emperyalîst mimkun e. Em ê li dijî emperyalîzm, reaksiyon û polîtîkayên mezhebî parastina aştî, laîkîtî, biratiya di navbera gelan de û jiyaneke hêjayî rûmeta mirovan bidomînin.”
AMED
Platforma Tenduristiyê ya Amedê li dijî komkujiyên li Rojavayê ji bo mafê jiyanê nobed girt. Gelek kedkarên tenduristiyê beşdarî nobedê bûn ku li Odeya Bijîşkan a Amedê pêk hat. Ev pankart li hêwana nobedê hatin daliqandin: “Li Rojavayê mirin hebe, li Amedê jiyan nabe”, “Şer pirsgirêkek tenduristiya giştî ye, çareseriya wê aştî ye” û “Parastina Rojavayê parastina mirovahiyê ye.”
Serokê Odeya Bijîşkan a Amedê Veysî Ulgen, di çalakiyê de axivî û bal kişand ser êrişên li dijî Kurdan û got: “Kurd dixwazin li ser axa ku lê dijîn xwe birêve bibin û xwe biparêzin. Ev mafê wan ê herî xwezayî ye. Mafê kesî tune û divê nebe ku li ser vê mijarê ji Kurdan re tiştekî bibêje. Kurd ji bo aştiyê ne; ew naxwazin kes bimire. Em dixwazin di nava aştî û azadiyê de bijîn.”
ÊLIH
Li Êlihê, Platforma Ked û Demokrasiyê li Parka Yilmaz Guney daxuyaniyek da. Di çalakiyê de pankarta “Gelê Rojavayê ne bi tenê ye” hat vekirin. Hevserokê Şaxa Sendîkaya Kedkarên Perwerde û Zanistê (Egitim-Sen) Ramazan Bilmez axivî û bertek nîşanî êrişên li ser Rojavayê da û got: “Avakirina aştiyeke mayînde û adil li Rojavayê û li seranserê Sûriyeyê bi naskirina Kurdan wekî aktorên siyasî yên rewa, beşdariya wan a bi bandor di mekanîzmayên demokrasiya herêmî de û pêşxistina pêvajoyeke çareseriyeke berfireh a li ser bingeha mafên mirovan ve girêdayî ye.”
Daxuyanî bi berzkirina dirûşmeyan bi dawî bû.
MÛŞ
Li ser banga Platforma Saziyên Demokratîk a Mûşê, êriş li navçeya Kop a Mûşê hatin protestokirin. Gelek welatî li ber avahiya Rêxistina Navçeya Kopê ya DEM Partiyê kom bûn û bi dirûşmeyên wekî “Bijî berxwedana Rojava” êroşan protesto kirin. Piştre girse ber bi meydana bajêr ve meşiya. Li wir, Hevserokê Navçeya Kopê ya DEM Partiyê Abdulbarî Yîgît, diyar kir ku ew ê êrişên li dijî Rojavayê qebûl nekin.
Daxuyanî bi çepik û dirûşmeyan bi dawî bû.
ENQERE
Li banga Platforma Saziyên Demokratîk a Enqereyê, li pêşiya Şaredariya Çankayayê çalakî hate lidarxistin. Jinên ku tevlî çalakiyê bûn, ji bo balê bikşînin ser qutkirina keziya şervana YPJ’ê ku ji aliyê HTŞ’ê ve hate qetilkirin, porê xwe kirin kezî. Besna Gumuş di daxuyaniyê de axivî û diyar kir ku bêdengiya li dijî êrîşên li ser Rojava sûc e. Gumuş ji bo piştevaniyê bang li raya giştî ya navneteweyî kir.
ÎZMÎR
Li Îzmîrê destûr nehat dayîn ku Hêzên Ked û Demokrasiyê yên Îzmîrê, li Alsancakê bimeşin. Di dorpêça polîsan de daxuyaniya çapemeniyê hate dayîn. Sekretera Giştî ya Baroya Îzmîrê Zohre Dalkiran di daxuyaniyê de axivî û destnîşan kir ku divê êrîşên li ser sivîlan tavile werin rawestandin. Di êrîşa polîsan a piştî daxuyaniyê de, gelek kes bi êşkenceyê hatin binçavkirin.
MÊRDÎN
Gel li navenda Mêrdîn û navçeyên wî, bi çalakiyan bertek nîşanî êrîşan dan. Di çalakiyan de daxwaza tavile rawestandina êrîşan hate kirin.
STENBOL
Bediya Kiliç ku di daxuyaniya li pêşiya avahiya Rêxistina DEM Partî ya Başakşehîrê de axivî, diyar kir ku êrîşên li ser Rojava destkeftiyên siyasî yên gelê Kurd hedef digrin.
