Hevserokê Giştî yê DEM Partiyê Tûncer Bakirhan beşdarî meşa li baskê Marmarayê bû ku ji Çerkezkoyê destpê kir. Di meşê de li dijî xizanî, parvekirina newekhev û budçeya şer daxwaz hatin ser ziman.
Bakirhan diyar kir ku budçeya ji aliyê hikumetê ve hatiye amadekirin kedkaran, mûçegirên kêm, teqawît, xwendekar û jinan nabîne û para herî mezin ji sermayeyê, ji lêçûnên leşkerî re hatiye veqetandin.
Bakirhan diyar kir ku li gel atmosfera aştiyê jî lêçûnên parastinê ji sedî 34 hatiye zedekirin, nerazîbûn nîşanî vê yekê da û got, “Dema ku aştî di rojevê de ye, divê budçe ji bo kedkaran bê veqetandin, ne ji bo çekan.”
Bakirhan got, “Li Meclîsê di axaftinên li ser budçeyê de me tiştekî gelekî girîng got. Me got, Birêz Ocalan rêyek vekir, deriyek vekir. Li Tirkiyeyê ji bo aştî pêk were, berpirsyariyek mezin hilda ser milê xwe. PKK’ê xwe fesix kir. Çekan datîne. Wê aştiya navxweyî li Tirkiyeyê pêk were. Me got, bi milyaran dolarên ku hûn didin sermaye û lobiya faîzê, bidin kedkar û bindestan.”
Bakirhan bi bîr xist ku DEM Partî dixwaze mûçeyê kêmtirîn herî kêm bibe 46 hezar TL û ya teqawîtan jî bigihêje heman astê.
Tûncer Bakirhan anî ziman ku xizaniya li Tirkiyeyê kûr dibe, gefê li aştiya civakî dixwe û got, “Heta ku di aboriyê de edalet nebe aştiya civakî nabe.”
Piştî axaftinê girseya gel bi govendê meş dewam kir û li gel Bakirhan ber bi Esenyûrtê ve bi rê ket.
