Hevserokatiya Konseya Rêveber a KCK’ê ji ber koça dawî ya rojnamevan Osman Kiliç (Gundî) ku salên dûr û dirêj li Ewropayê karê dîplomasî û çapemeniyê meşand û wêjevan Ehmed Huseynî peyameke sersaxiyê weşand.
Peyama KCK’ê bi vî rengî ye:
BÛ YEK JI HÎMÊN BINGEHÎN ÊN KARÊ ÇAPEMENÎ Û DÎPLOMASIYÊ
“Hevrêyê me Gundî ku ji sala 1990’î û pê ve li Ewropayê di nava têkoşîna azadiyê ya gelê Kurd de bû, ji ber nexweşiya ku demeke dirêj pê ketibû, şehîd bû. Bila serê gelê me û malbata wî sax be. Hevrêyê me Gundî (Osman Kiliç) wê li Kurdistana azad û demokratîk her tim bê bîranîn.
Hevrêyê me Gundî salên dûr û dirêj karên dîplomatîk meşand. Piştre tevlî karên çapemeniyê bû. Li gelek saziyên çapemeniyê di asta berpirsyariyê de xebitî. Herî dawî li ANF’ê wezîfeya dîrektoriyê dikir.
Ji malbateke welatparêz a ji Sêrtê bû. Keça vê malbata me ya welatparêz ku bavê wê mele bû, Newroz (Melahat Hîdayet Kiliç) sala 1993’an li nava refên gerîla şehîd bû. Hevrêyê me Gundî ji roja ku tevlî bû û pê ve çi wezîfe jê re hate dayin, ew bi cih anî. Bi dehan salan, bi kesayetiya xwe ya dilnizm hewl da her wezîfeyê bike. Li Ewropayê bû yek ji hêmanên esasî yên karên çapemenî û dîplomasiyê.
Hevrê Gundî, li gel ku bi nexweşiyeke giran ketibû heta rojên xwe yên dawî jî karê xwe meşand. Dilsoziya xwe ya bi xeta Rêber Apo û Tevgera Azadiyê di kêliyên herî zehmet de jî dewam kir û bû xwedî sekneke mînak. Hevrêyê me Gundî ku yek ji kedkarên mînak ên têkoşîna azadiyê bû, wê her tim bi vê taybetmendiya xwe bê bîranîn. Kurdistana azad û Rojhiata Navîn a demokratîk ku hesreta wî bû, wê tekez pêk were.
KURDISTANA AZAD Û DEMOKRATÎK WÊ BI HESTA HELBESTVANAN AVA BIBE
Helbestvan, wêjevan û rewşenbîrê Kurd ê hêja Ehmed Huseynî jî jiyana xwwe ji dest da. Bila serê malbata wî, civata huner û wêjeyê û tevahiya gelê Kurdistanê sax be. Hunermend, wêjevan û rewşenbîr ruhê civakê ne. Ji aktorên bingehîn e ku gel û civakê diparêzin û digihînin paşerojê.
Ehmed Huseynî jî bi helbestên xwe di afirandina ruh û hestên gelê Kurd de kedeke mezin da. Welatparêziya xwe ya xurt, hezkirina ji welat û gelê xwe di helbestên xwe de nîşan da. Têkoşîna azadiyê ya gelê Kurd ji nêz ve şopand û hîs kir. Şewata sînemayê ya li Amûdê di helbestên Ehmed Huseynî de deng veda û gihand nifşên nû.
Ehmed Huseynî ku helbestvanekî bijartî yê kevneşopiya helbestvanan a Amûdê bû, li bajarê Amedê yê Bakurê Kurdistanê jî ma. Dema li Amedê bû şoreşa demokratîk û guherîna li nava civakê ya li Bakurê Kurdistanê ji nêz ve dît. Vê yekê bandor hem li kesayetiya wî hem jî li helbestên wî kir. Bi Şoreşa Rojava re derbasî Rojava bû, li vê derê tevkarî li karên wêjeyê kir. Beşdarî nava karên Yekîtiya Rewşenbîran bû û ji bo mayindebûna şoreşê hewl da wezîfeya dikeve ser milê xwe bi cih bîne.
Ehmed Huseynî salên dûr û dirêj di nava kevneşopiya çapameniya azad de li MED TV, Medya TV, ROJ TV, Çira TV, Ronahî TV, Mezopotamya TV bernameyên wêje û helbestan amade kir.
Ehmed Huseynî tevkariyên girîng li zimanên Kurd kir ku asîmîlasyon lê tê ferzkirin. Bi serweriya xwe ya li ser hevokan kir ku zimanê Kurd xurt bibe. Berhemên ku afirandiye wê tevkariyeke mezin li karê helbestvan û wêjevanan bike. Ji ber ku di nava têkoşîna şoreşgerî de bû, naveroka helbestên wî jî gelekî xurt bû; xwedî wê coş û motîvasyonê bû ku hîn bêhtir berheman biafirîne. Em di wê baweriyê de ne ku helbestvanên li Rojava û tevahiya Kurdistanê wê karên wî bi wate bikin. Kurdistana azad û demokratîk ku hesreta wî bû, bi ruh û hestên ku helbestvan diafirînin wê tekez pêk were.”
