TIRKİYE PÊVAJOYA GUHERÎNA CÎHANÊ BAŞ PÊŞWAZÎ NAKE’
Bakirhan bal kişand ser şerên li gelek welatên cîhanê û destnîşan kir ku Tirkiye bi aboriyeke qels û demokrasiyeke kêm dikeve vê pêvajoyê. Wî diyar kir ku li welat bi mîlyonan mirov bi birçîbûnê re rû bi rû ne, lê zema ku li karmend û teqawîdan tê kirin “bêwijdanî” ye.
‘DEMOKRASÎ NEBE WELAT JI MUDAXELEYÊN DERVE RE VEKIRÎ DIBIN‘
Bakirhan anî ziman ku dewletên bêdemokrasî lawaz dibin û got: “Rêya rawestandina gefan ne tank in, aştiya civakî ye. Desthilatên ku xwe naspêrin vîna gel, nikarin demdirêj li ser piyan bimînin.”
‘TIRKİYE POLÎTÎKAYA XWE YA ROJHILATA NAVÎN LI SER DIJMINATIYA KURDAN AVA KIRIYE’
Bakirhan êrîşên li ser taxên Şêxmeqsûd, Eşrefiye û Binî Zêyd ên Helebê şermezar kirin û got: “Ev êrîş li dijî hêviya jiyana hevpar a Kurd, Ereb, Elewî û Durziyan e. Tirkiye bi sedsalan e bi vê polîtîkayê tiştek bi dest nexistiye. Divê tank û top tavilê vekişin.”
‘HÛN NIKARIN BI POLÎTÎKAYÊN YEKPEREST SÛRİYÊ BIRÊVE BIBIN’
Bakirhan destnîşan kir ku vîna gelan nayê tepisandin û bi bîr xist ku Kurdan li dijî DAÎŞ’ê serkeftinên mezin bi dest xistine. Wî got: “Kurdan duh DAÎŞ têk bir, îro jî dizanin têk bibin. Çawa li Kobanê li ber xwe dan, li Helebê jî wisa li ber xwe didin.”
‘TIRKİYE DIVÊ HÊZA XWE JI BO AŞTİYÊ BIKAR BÎNE’
Bakirhan bang li desthilatê kir ku li şûna rageşiyê, polîtîkaya diyalogê bişopîne: “Dijminatiya li xizmên 25 mîlyon Kurdên li vî welatî, bêwijdanî ye. Tirkiye divê li Sûriyê bibe parêzvana aştiyê, naxwe dê wekî welatekî dij-Kurd were bîranîn.”
‘PÊVAJOYA AŞTİYÊ NABE KU WERE PAŞXISTIN’
Bakirhan di dawiyê de got ku divê Komîsyona Meclîsê bê derengî raporên xwe eşkere bike û qanûnên azadiyê werin derxistin: “Yekane rê aştî ye. Em ê bi mîrasa Sakîne, Deniz û Mahiran vê tariyê derbas bikin û jiyaneke azad ava bikin.”
