Reuters destnîşan kir ku êrîşên HTŞ’ê wê bandorê li têkiliyên Sûriyeyê yên bi DYE û Tirkiyeyê re bike û diyar kir ku aqûbeta bi hezaran DAÎŞ’iyan nediyar bû. Di nûçeyê de bal hate kişandina ser zextên Tirkiyeyê yên ji bo “bêçek hiştina” QSD’ê. Hat ragihandin ku tevî daxuyaniya Nûnerê Taybet ê Sûriyeyê yê DYE’yê Tom Barrack a dibêje, ‘rola QSD’ê ya li qadê di asteke mezin de bi dawî bûye’, Washington hîna têkildarî bi hezaran DAÎŞ’î û malbatên wan bi fikar e.
The Guardian diyar kir ku li bakurêrojhilatê Sûriyeyê rewşa ewlehiyê her diçe xirab dibe û fikarên têkildarî ku dibe DAÎŞ car din derkeve holê, zêde dibe. The New York Times jî ragihand ku artêşa DYE’yê heya niha 150 DAÎŞ’î sewqî Iraqê kirine û ragihand ku dibe ev hejmar bibe 7 hezar. BBC jî diyar kir ku operasyonên neqlî, piştî ku QSD ji kampên xwe vekişiyan hatin destpêkirin.
Long War Journal ragihand ku rêveberiya Iraqê ji ber şer bi fikar e. Deutsche Welle jî bal kişand ser protestoyên girseyî yên ji bo Rojava yên li Elmanyayê.
LA LIBRE: XIYANETA LI HEMBERÎ KURDAN, HIŞYARKIRINA DAÎŞ’Ê YE
Di rojnameya La Libre ya Belçîkayê de, di nivîsa edîtor a bi îmzeya Dorian de Meeûs de, ev sernav hate bikaranîn: “Xiyaneta li hemberî Kurdan, hişyarkirina DAÎŞ’ê ye.” Di nivîsê de ev tişt hatin diyarkirin: “Dîmenên ji bakurêrojhilatê Sûriyeyê gihiştine me, bi êş in. Ev dîmen zextên tund ên hêzên rejîma Sûriyeyê û milîsên wan ên li hemberî Kurdan, nîşan didin. Êşkenceya li hemberî sivîlan û zarokan, înfazên bêdaraz û tundiya zêde. Hovîtî ye.”
FRANCEINFO: DIBE TERORÎSTÊN DAÎŞ’Ê BÊN BERDAN
Radyoya Fransî Franceinfo ragihand ku dibe bi hezaran DAÎŞ’î û malbatên wan reviyabin û ev tişt hate gotin:
“Fikarên têkildarî ku wê li Sûriyeyê terorîstên DAÎŞ’ê bên berdan, zêde dibin. Ev çend roj in Kurd ji aliyê artêşa Sûriyeyê ve rû bi rûyê êrîşan dimînin. Li navenda şer bi hezaran cîhadîst tên girtin û heya niha girtîgehên ku ji aliyê Kurdan ve tên parastin hene. Şervanên kevin ên Dewleta Îslamê û bi deh hezaran jin û zarok dibe birevin.”
