Piştî ku Tevgera Azadiya Kurd bi erêkirina Rêber Apo re biryara hêzên gerîla kişandina dervayî sînorên Tirkiyeyê da derbasî qonaxa duyemîn a pêvajoya “Aşitî û Civaka Demokratîk” bûn. Vê gavê dîrokî ku armanc dike bingeha siyasî û hiqûqî ya pêvajoyê ava bike, pisporê Siyaseta Navnetewî Toros Korkmaz û Siyasetnas Mehmet Zahir Saritaş ji ANF’ê re nirxandin.
‘DIVÊ DEWLET REFORMÊN KURT Û DIRÊJ YÊN DEMÎ BIXE MERIYETÊ’
Toros Korkmaz, bal kişand ku biryara dîrokî ya Tevgera Kurd dewletê neçarî gavên şênber dike û gavên ku divê di demeke kurt de bêne avêtin rêz kir û got ku divê bi îstifadekirina ji ‘mafê hêviyê’ yê ku Rêber Apo jixwe bi dest xistiye, azadiya wî ya teqez bê pêkanîn.
Korkmaz got ku divê hemû girtiyên PKK’ê û siyasetmedarên Kurd ên hîn di girtîgehê de ne, bi taybetî Selahattin Demirtaş û Figen Yüksekdağ, bêne berdan. Her wiha divê ji bo kadroyên siyaseta Kurd a demokratîk ên ku neçar man biçin derve, li Tirkiyê şert û mercên siyaseta azad bêne çêkirin û hemû dozên li dijî kadroyên PKK’ê bi beraetê bi encam bibin. Ji bo bidawîbûna sepandinên qeyûm ên neheq jî, guhertina qanûna rêveberiyên xwecihî ji bo pêşveçûna pêvajoyê girîng e.
Korkmaz, ji bilî van reformên demkurt, di demên navîn û dirêj de jî peydakirina mafên zimanê dayîkê û çandî; guhertina pênaseya hemwelatiya destûrî ji nasnameya etnîk a Tirk bi awayekî ku hemû nasnameyên etnîk ên di welat de bigire nav xwe, divê guhertinên bingehîn ên esasî bêne kirin jî anî ziman.
‘BI VEKIŞÎNA GERÎLA RE HINCET NEMAN, DIVÊ QONAXA HIQÛQÎ DEST PÊ BIKE’
Siyasetnas Mehmet Zahir Saritaş jî anî ziman ku bi daxuyaniya 26’ê Cotmehê biryara vekişîna hemû hêzên gerîla yên li Tirkiyê bo Herêmên Parastina Medyayê wekî gavê derbasbûna qonaxeke nû ya pêvajoya Aşitî û Civaka Demokratîk û piştgiriya plana stratejîk a Rêber Apo armanc dike.
Saritaş got ku daxuyaniya Serokê MHP’ê Devlet Bahçeli ya “Ocalan bila PKK’ê fesih bike, were Meclisê li koma DEM Partiyê biaxive û ji mafê hêviyê îstifade bike” nirxand û got ku ev nîyetek îfade dike. Li hember vê jî hewldanên Rêber Apo yên pirsgirêka Kurd ji zemîna şîdetê derxistina zemîna siyaseta demokratîk bi bîr xist û got ku di ronahiya van pêşveçûnan de biryarên PKK’ê yên fesihkirina xwe û bidawîkirina têkoşîna çekdarî gavên dîrokî yên girîng in.
Sarıtaş, bal kişand ku li hember van gavên dîrokî yên aliyê ji Kurdan ve hatiye avêtin dewlet tenê bi damezrandina komîsyoneke Meclisê avakiriye û gavên şênber neavêtiye. Û got ku bi biryara vekişînê re divê dewlet ji nêzîkatiya xwe ya heta niha ya “Tirkiyeya bê teror” dev jê berde û derbasbûna qonaxa duyemîn, yanî qonaxa muzakere û hiqûqî wekî armanca bingehîn deyne pêşiya xwe.
Zahir Saritaş, bal kişand ku ev biryar bi erêkirina Rêber Apo hatiye girtin û ev jî nîşan dide ku bi dewletê re muzakere tê kirin û divê ev di çarçoveya pêşveçûna pêvajoyê de bê nirxandin.
Saritaş got ku ew hêvî dike ku dewlet bi nêzîkatiyeke cidîtir gavên ku entegrasyona demokratîk û hiqûqî armanc dike biavêje û di vê çarçoveyê de hevdîtina heyeta Îmraliyê ya 30’ê Cotmehê bi Serokomar re girîng e.
