Pîrozbahiya Newroza Enqerê li Anitparkê pêk hat. Bi hezaran kes ji serê sibê ve ber bi qadê ve çûn. Tevî baranê jî, welatiyên ji 7 saliyan heta 70 saliyan, bi cilên gelêrî beşdarî pîrozbahiyê bûn. Qad bi alayên kesk û sor û zer hat xemilandin û jin bi cilên xwe yên gelêrî qadê rengîntir kirin.
Kesên ku hatin qadê, li ber stranan govend gerandin û dirûşmeyên wekî “Bijî Serok Apo”, “Bijî berxwedana Rojava” û “Yan mirin yan serok” berz kirin. Di pîrozbahiyê de endamê Konseya Hevserokatiya Partiya Yekîtiya Demokratîk (PYD) Salih Muslim hat bîranîn. Pîrozbahiyê ku bi rêzgirtinê dest pê kir, li ser navê Hêzên Ked û Demokrasiyê yên Enqerê daxuyaniyek hevbeş hat xwendin. Nebun Nebahat Çalpan metna Kurdî û Pinar Guzel jî metna Tirkî xwend.
Di daxuyaniyê de îşaret bi şerê ku li Rojhilata Navînê li dijî gelan hat kirin û li dijî faşîzmê li ser têkoşîna hevpar û hevgirtina şoreşgerî hat sekinandin.
Her wiha di daxuyaniyê de rêgeza “mafê hêviyê” ya Rêber Apo hat destnîşankirin û hat gotin ku divê “mafê hêviyê” ji bo hemû girtiyên siyasî bê naskirin. Her wiha hat destnîşankirin ku divê dawî li tecrîdê, binçavkirin û girtinên kêfî, pêkanînên qeyûman, îşkence û binpêkirinên mafan bên. Hat gotin ku ew ê li her derî agirê azadî û demokrasiyê gur bikin û bi hev re jiyaneke hevbeş ava bikin.
Paşê Seroka Giştî ya Partiya Şoreşger Elîf Torûn Onerenê axivî. Elîf Torûn Onerenê bilêv kir ku ev qad bi hêsanî nehatine bidestxistin û got: “Ev qad, bi saya kesên ku li Zindanên Amedê agir berdan bedena xwe hatin bidestxistin. Silav ji hevrêyên me re.”
Elîf Torûn Onerenê destnîşan kir ku heya zextên li ser zimanê gelê kurd, azadiya wî û nasnameya wî neyên rakirin aştî ne pêkan e û got: “Meseleya aştiyê meseleyeke dîrokî ye.”
Herî dawî Hevserokê Kongreya Civaka Demokratîk (KCD) Berdan Ozturk axivî. Ozturk anî ziman ku daxwazên gelen Kurdistan û Tirkiyeyê gihandine her derî û got: “Birêz Ocalan, peyama Newrozê şand. Li Rojhilata Navînê şerên emperyalîsît tên kirin. Lê tekane rizgarî civakeke wekhev, azad û demokratîk e. Birêz Ocalan, di peyama xwe de çareseriyê pêşkêşî me dike. Em dixwazin azad bibin, em jiyaneke birûmet dixwazin. Rêya ku birêz Ocalan pêşkş kiriye, ji bo Tirkiyeyê firsendeke mezin e.”
Piştî axaftinan agirê Newrozê hat vêxistin.
Pîrozbahî bi stranên Diljen Ronî û Ozgur Tûgçe Agê û govendgerandinê bi dawî bû.
