Rojnamevan Dîlek Odabaş ku beşdarî konferansa “Jin bi hev re li ser paşerojê diaxivin” a li Enqereyê bû, têkildarî roja jinan a di avakirina aştî û civaka demokratîk de û rojnamevaniya jinê ji ANF’ê re axivî.
Dîlek Odabaş anî ziman ku hem weke kedkareke çapemeniyê hem jî weke jinekê beşdarî konferansê bû û destnîşan kir ku kombûnan jinan ji beşên cuda yên civakî û nîqaşkirina pirsgirêkên hevpar girîng e.
Odabaş anî ziman ku di pêvajoyên aştiyê de yên li cîhanê medya bi rola çêker radibe û destnîşan kir ku li Tirkiyeyê binçavkirin û zexta li ser rojnamevanan li ruhê pêvajoyê neyê.
Odabaş got, “Çapemenî, medya di meseleya aştî û demokrasiyê de aliyek e û divê timî li aliyekî bimîne. Weşangeriya li ser pîvana bêalîbûnê nayê wê wateyê ku mirov xwe nedin aliyê aştî, maf û edaletê. Berevajî vê yekê divê li ser van hemû mijaran bi berpirsyariyê rabe, pêşî veke. Em di demeke welê de ne ku li welatê me medya li nava yekdestî kom bûye. Bi vê yekdestiyê re medya veguheriye amûreke hêzê ya desthilatdariye.”
Dîlek Odabaş ragihand ku hin saziyên medyayê yên ne yên desthilatdariyê ne veguherîne amûreke hêzê ya muxalefetê û destnîşan kir ku hebûna medya serbixwe ji bo aştî û demokrasiyê nebe nabe.
Rojnamevan Dîlek Odabaş diyar kir ku di Pêvajoya Aştî û Civaka Demokratîk de divê her kes bi berpirsyariyê rabe û anî ziman ku desthilatdarî hîn jî pêvajoyê di çarçoveya polîtîkayên ewlekariyê de dinirxîne.
Odabaş bendewariya ji pêvajoya aştî û civaka demokratîk jî anî ziman û got, “Em, yên ku 50 sal in li şer rast hatine, ewladên xwe winda kirine, di serî de Kurd û Tirk; Elewî, Sûnî, jin, ciwan weke mirovên ku jiyaneke wekhev a li vî welatî diparêzin, em neçar in bi dil û can piştgiriyê bidin vê pêvajoyê, xwedî lê derkevin. Ji ber ku ji bilî vê rêyeke din nîne.”
‘DI ROJNAMEVANIYA AŞTIYÊ DE DIVÊ ZIMANEKÎ PIRRENGÎ BÊ BIKARANÎN’
Dîlek Odabaş destnîşan kir ku rojnamevaniya aştiyê divê zimanekî welê bi kar tîne ku sor nake, dijberiyê neafirîne, cihêkariyê nake, zimanekî pirreng be û got, “Kî xwe çawa pênase dike, bi kîjan zimanê civakê diaxive, xwedî kîjan çand, jiyan û kevneşopiya hezaran salî ye û li vî welatî aştiyê diparêze, em jî divê bibin dengê wê aştiyê, zimanê me jî di her şert û mercî de divê xizmetê ji aştiyê re bike.”
Odabaş anî ziman ku bilindkirina aliyekî û mehkûmkirina aliyê din li rojnamevaniya aştiyê nayê û got, “Eger dayika Kurd û dayika Tirk qebûl kiribin ku li hev bikin, wê demê berpirsyariya me hemûyan e ku em wî zimanê aştiyê mezin bikin.”
‘BI BILINDKIRINA DENGÊ JINAN EM Ê KARIBIN TEVKARIYÊ LI AŞTIYÊ BIKIN’
Rojnamevan Dîlek Odabaş anî ziman ku şer bandora herî giran li jinan dike, lewma divê dengê jin û zarokan hîn bêhtir bê bihîstin.
Di vê çarçoveyê de işaret bi rola jinan a di civakîkirina aştiyê de kir û got, “Divê em dengê jin û zarokan bidin bihîstin ku weke xenîmeta şer têne dîtin. Di şer de kes qezenç nake. Lê belê di şer de jin qet qezenç nakin. Mêr şer dide destpêkirin, mê mezin dike, mêr dimeşîne. Û di vir de mebesta min aqlê mêr e. Aqlê mêr û aqlê dewletê yek e.
Halbûkî em jin li hemberî vî aqlî weke yên ku mirovahiyê xwedî dike, bi îradeya jiyana hevpar, bi bilindkirina dengê jinan dikarin tevkariyê li vê aştiyê bikin.
Divê jin jî karibin bi mexdûrên vî şerî re bicivin. Dikarin dengê jinên ku heta niha vê têkoşîna maf dimeşînin bidin bihîstin. Û dikarin wan pirsan bikin ku dema qenalên siyaseta demokratîk bêne vekirin wê têkoşîna wan jinan destketiyên çawa bi xwe re bîne.
Bi dîtina min, pêvajoyeke aştiyê re ya ku bi bersiva van pirsan re civak qanih bibe, wê karibe bibe gava destpêkê ji bo pêvajoya civakîbûnê.”
