Li dijî êrişên HTŞ, DAIŞ û komên paramîlîter ên girêdayî dewleta Tirk ên ser rojavayê Kurdistanê, li navçeya Hezexê ya Şirnexê bi pêşengtiya Platforma Saziyên Demokratîk bi beşdariya 7 salî heta 70 salî bi hezaran kesan meş hat lidarxistin. Welatiyên ser Cadeya Alanyayê hatin gel hev, xwest ber bi şaredariya berê ve bimeşe. Lêbelê polîsan li pêşiya wan berîqet danî û xwestin tevlibûnê asteng bikin. Welatiyan, li dijî ferzkirina sepana lêgerîna ser welatiyan dirûşmên “Bijî berxwedana Rojava” û “Em ê bi berxwedanê bi ser kevin” berz kir. Piştî berteka girseyê, polîsan dev ji vê sepana xwe berda.
Çendek saet ji bo meşê mabûn ku li cihê çalakiyê bi dirûşmên “Bijî berxwedana Rojava”, “Rojava dê ji DAIŞ’ê re bibe goristan” û sirûdan olan da. Girseyê, dovîzên weke “Ji şer re bibêje bes e”, “Rojava rûmeta me ye”, “Bijî berxwedana gelê Kurd” û pankarta “Şoreşa Rojava bû tirs û xofa dilê neyar û hovan” hilgirt. Bi hezaran kes tev li meşê bûn û gelek caran dirûşmên “Bijî berxwedana Rojava”, “Rojava dê ji DAIŞ’ê re bibe goristan”, “Bijî berxwedana HSD’ê” û “Rojava rûmeta gelê Kurd e” berz kir û tililî avêt. Her ku çû girse mezintir bû. Meş, bi pêşengtiya Dayikên Aştiyê hat lidarxistin.
Piştî meş bi dawî bû, daxuyanî hat dayin. Beriya daxuyaniyê deqeyek rêz hate girtin. Piştre jî Hevserokê DEM Partiyê yê Hezexê Niyazî Çevrîm axivî û got ku heta gelê Kurd azad dibe dê li Rojava li ber xwe bide.
Wekîlê DEM Partiyê yê Şirnexê Zekî Îrmez di daxuyaniyê de got ku gelê Hezexê bersiva pêwîst daye zîhniyeta DAIŞ’ê û ev tişt anî ziman: “Îro em li her çar parçeyên Kurdistanê bûn yek. Em ê bi yekitiya xwe bi ser kevin. Gelê Rojava 10 sal berê xwe li dijî êrişên DAIŞ’ê parast û şoreş kir. Hinek hêzên tarî tehemûla vê pergalê nekir. Ev êriş, bi piştgiriya Tirkiyeyê tên kirin. Tirkiye, ji bo Kurd xw birêve nebin, piştgiriyê dide zîhniyeta DAIŞ’ê. DAIŞ-Tirkiyeyê winda kir û dê niha jî tifaqa HTŞ-Tirkiyeyê winda bike. Bila kesek li benda bêdengbûna me nebe. Em ê xwedî li xwişk-birayên xwe derkevin. Berxwedan dê bi ser keve.”
Wekîla DEM Partiyê Newroz Uysal Aslan jî got ku êrişên tên kirin li dijî çar parçeyên Kurdistanê ne û got: “Gelê Kurd her tim dibêje ku alîgirê aştiyê ne. Lê heke ji bilî şer tu vebijêrk nemînin jî dê li ber xwe bide. Gelê Kurd heta niha serî netewand û dê netewîne. Gelê Nisêbînê, Agiriyê, Amedê û her çar aliyên Kurdistanê ser pêya ye. Tişta ji bo me pêwîst, yekitî û berxwedan e. Em ê heta dawiyê piştgiriyê bidin Rojava.”
Daxuyanî, bi dirûşmên “Rojava dê ji DAIŞ’ê re bibe goristan” û “Yeke yeke gelê Kurd yek e” bi dawî bû. Piştî daxuyaniyê, girse belavî kolanan bû, meş li dar xist û dirûşm berz kir. Çalakiya ciwanan li tevahiya Hezexê belav bû.
