Piştî hilweşîna rejîma Baas li Sûriyeyê me ti guhertinên berbiçav nedîtin. Xuya ye wê zû bi zû çênebin jî. Dewleta Tirk û hêzên hegemon hewl didin tiştên dixwazin bi destê DAÎŞ’ê û komên din ên weke HTŞ’ê pêk bînin. Jixwe di hişmendiya wan de ti guherîn û veguherîn tineye.
Di rewşa niha de li Sûriyeyê rêbazên dewleta Tirk û çeteyên DAÎŞ’ê têne bikaranîn. HTŞ jî teqlîda dewleta Tirk dike û ji efendiyên xwe re pir wefadar in. HTŞ siyaseta Tirkan bi kar tîne. Dewleta Tirk jî HTŞ’ê rewa dike. Jixwe yên welê rewabûna hev weke fitûyên meleyan peyda dikin û şahidê wan jî weke rovî dûvikê wan e.
Careke din durûtî, bêwijdanî û bêexlaqiya desthilatdaran û dewletên netewe li dijî gelên Sûriyeyê bi tundî disekine û xwe li ser wan ferz dike. Armanca wan ew e xwe navendî bikin, li ser jin û civakê weke zordaran xwe ferz bikin da ku xeyalên xwe yên serweriyê pêk bînin. Dixwazin desthilatdariya xwe ya tekperest û tundrew hakim bikin. Rejîma Baas jî bi dehan salan wer tevdigeriya û di dawiyê de hilweşiya. Ma ew jî nafikirin heman siyaset û rêbaz teqez wê bi têkçûn û hilweşînê bi encam bibin.
Piştî êrîş û komkujiyên li Lazqiyê û Siwêdayê niha jî li hember Bakur û Rojhilatê Sûriyeyê gef tên xwarin. Careke din hewl didin bingehê çeteyên DAÎŞ’ê xurt bikin û li dijî hêzên QSD’ê bi kar bînin.
Dixwazin bi êrîşên nemerd rewşa heyî li herêma Bakur û Rojhilatê Sûriyeyê xerab bikin. Ewlehiya li wan deveran bikin nîqaşan. Bi rêya cîhadîstên Selefî hewl didin hişmendiya, qatilên kastîk careke din bi rêxistin bikin.
Dewleta Tirk piştgiriya dida DAÎŞ’ê îro jî bi heman rengî ji bo HTŞ’ê jî berdewam dike. Ji bo desthilata HTŞ’ê xwe berdewam bike, hemû hêza xwe dixebitînin. Bi êrîşên 6’ê Cotmehê yên li hember Şêxmeqsûd û Eşrefiyê yên li Helebê jî xwestin çirûska şerekî nû yê li hember gelê Kurd bidin destpêkirin. Lê bêguman bi berxwedana gelê me ew hedef û armanca çeteyan pûç bû.
Hemû hewldanên wan ew e gelên li herêmên xweser jî çavtirsandî bikin û serweriya xwe li ser wan ferz bikin. Dixwazin bi zorê desthilatdariya wan çeteyên Selefî li ser gelan bidin qebûlkirin.
Ev jî tundrewiyeke pir xerab û ne rewaye. Divê hemû gelên Bakur û Rojhilatê Sûriyeyê bertekên xwe raber bikin û ev hewldanên rûreş bibin sedema serhildanên girseyî yên gelan. Banga min ji hemû jin û ciwanan re ew e em yekîtî û rêxistiniya xwe xurt bikin, hêzên tundrew û êrîşên wan bişikînin.
