Li Heleb, Qamişlo, Kobanê, Reqa û Hesekê bi munasebeta 25’ê Mijdarê Roja Têkoşîna Navneteweyî li dijî Tundiya li ser Jinan meşên girseyî hatin lidar xistin. Di çalakiyên ku bi pêşengiya Platfoma Çalakiyên Hevbeş a Rêxistin û Tevgerên Jinan a Bakur û Rojhilatê Sûriyeyê de hatin organîzekirin de bi hezaran jin û mêr, peyamên bilindkirina têkoşînê dan.
HELEB
Bi pêşengiya nûnerên tevgerên jinan ên Helebê, endamên Hêzên Ewlekariya Hundirîn-Jin, bi sedan şêniyên taxên Şêxmeqsûd û Eşrefiyê yên Helebê meşek lidar xist.
Meş ji pêşiya Hola Civînan a 8’ê Adarê ya li taxa Şêxmeqsûdê dest pê kir. Di meşê de wêneyên Rêber Apo, alên Kongra Star û wêneyên şehîdên azadiyê hatin hildan, her wiha dirûşmên “Bêdengiyê bişikîne, teslîm nebe”, “Bi felsefeya Jin, Jiyan, Azadî xwe biparêze”, “Pergala dewletê jinan qetil dike” û “Na ji tundiya li ser jinan re.. Jin, Jiyan, Azadî” hatin berzkirin.
Meş li herêma Cebanat veguherî mîtîngê û deqeyekê rêz hat girtin. Endama Koordînasyona Kongra Star a Helebê Rîhana Elo axivî û diyar kir ku têkoşîna ji bo azadiya jinan di serdema nûjen de ji aliyê xwişkên Merîbal ve hat destpêkirin û li Kurdistanê bi pêşengiya şehîdên azadiyê, dewam kir.
Rîhana Elo, destnîşan kir ku civakên ku jin tê de ne azad bin, ew civak ne azad e. Her wiha binpêkirnên pergalên dewletê yên li dijî jinan, bi taybetî biryarên tund ên rejîma Îranê yên li ser jinên çalakvan şermezar kirin û siyasetên hikûmeta veguhêz a Sûriyeyê ya dûrxistina jinan jî rexne kirin.
Ji rêveberên Yekitiya Jinên Ciwan Şems Elîeldîn jî got jinên bi ramanên Rêber Apo bawer in dê li hemberî siyasetên pergalên baviksalar û hêzên kapîtalîst ên ku jinan asteng dikin û rola di civakê de tune dihesibînin, bisekinin.
Mîtîng bi berzkirina dirûşmên “Jin, Jiyan, Azadî” bi dawî bû.
QAMIŞLO
Meş li Çerxerêya Frina Sîna dest pê kir. Bi sedan jin û mêr ji Qamişlo, Tirbespiyê, Amûdê, Til Koçer, Çilaxa, Dêrik û Girkê Legê û Til Hemîsê tevlî meşê bûn.
Di meşê de pankartên bi nivîsên “Jin jiyan e, jiyanê nekujin”, “Bi hev re e dawî li tundiya li dijî jinan bînin”, “Bedena me çeka me li dijî tundiyê ye”, “Em hene..em xwediyên têkoşînê ne” hatin vekirin û bênavber dirûşmên “Jin, Jiyan, Azadî” û “Na ji tundiya li dijî jinan” hatin berzkirin.
Meş heta pêşiya Stadyûma Heysem Kiço dom kir û deqeyekê rêz hat girtin.
Berdevka Kongra Star Rihan Loqo, axivî û diyar kir ku 25’ê Mijdarê roja biryardariya avakirina hevjiyaneke azad e.
Rîhan Loqo, di axaftina xwe de şehîdên azadiyê bi bîr anîn û soza domandina têkoşîna li hemberî feraseta baviksalar da.
Her wiha destnîşan kir ku berxwedan û têkoşîna jinan kevirê bingehîn ê bidestxistina mafên xwe ye.
Hevseroka Meclîsa Rêveber a Kantona Cizirê Viviyan Beho, jî destnîşan kir ku parastina jinan erk û berpirsyariyeke civakî ye.
Viviyan Beho, bal kişand ser têkoşîna jinên Bakur û Rojhilatê Sûriyeyê û bi bîr xist ku jinên herêmê civakê bi rêve dibin û afrînerên guherînê ne.
Viviyan Beho, anî ziman ku têkoşîna li dijî jinan ne dirûşmeke ji rêzê ye, lê belê ji bo avakirina civakeke ewle, bi rûmet ku jin tê de bi azadî di hemû qadan de cihê xwe bigire, erkekî rojane ye.
Di dawiyê de Koma Şehîd Yusra ya Tevgera Hîlala Zêrîn a Çanda Jinan şanoyeke li ser têkoşîna jinan a li hemberî tundiyê pêşkêş kir.
KOBANÊ
Kogra Star a kantona Firatê bi boneya 25’ê Mijdarê Roja Têkoşîna li dijî Tundiya li ser Jinan meşek lidar xist.
Di meşê de wêneyên Rêber Apo û alên Kongra Star û yên Rêxistina Sara hatin hildan û dirûşmên “Jin Jiyan Azadî”, “Berxwedan jiyan e”, “Bê Serok jiyan nabe” hatin berz kirin.
Meşê ji Qada Şehîd Egîd dest pê kir û heta Qada Jina Azad a Kobanê dewam kir. Li vir ji bo şehîdên şoreşê deqeyek rêz hat girtin, dûre endama Koordînasyona Kongra Star a bajarê Şêranê Nadiya Hiso, axivî û wiha got: “Ev roj roja berxwedan û têkoşînê ye. Komkujiya li hemberî jinan, komkujiya li dijî civakê ye. Hişmendiya desthilatdar, ew zîhniyeta ku dixwaze mafên mirovan ji cîhanê rake, yekser êrîşî jinan dike. Jin dixwazin jiyaneke aram û wekhev ava bikin. Jinan bi têkoşîn û berxwedana xwe li ser fikir û felsefeya Rêber Apo xwe bi rêxistin kir û bi hemû hêza xwe dijmin têk bir û ji hişmendiya desthilatdar re got na.”
Meş bi dirûşmên “Jin Jiyan Azadî”, “Bê Serok jiyan nabe” bi dawî bû.
REQA
Li bajarê Reqayê jî bi beşdariya gireseyek mezin a jinên ji kantonên Reqa, Tebqa û Dêrazorê meşek girseyî hat lidar xistin. Meşa ku endamên saziyên sivîl, leşkerî, rêxistinên jinan, nûnerên Rêveberiya Xweser tevlî bûn ji Çerxerêya Panorama ya bajarê Reqayê dest pê kir û li Qada Jina Azad dewam kir.
Li Qada Jina Azad deqeyekê rêz hat girtin. Berdevka Kombûna Jinan a Zenûbiya Xod El Îsa, axivî û anî ziman ku ev roj xaleke girîng di têkoşîna jinên Sûriyeyî de ye.
Xod El Îsa, bal kişand ser binpêkrinên ku li dijî jinan têne kir û got: “Mafê her jinekê heye ku bi ewle û bi rûmet bijî.” Xod El Îsa, şervanên YPJ’ê û QSD’ê silav kirin û behsa rola wan a parastina jinan û herêmê kir.
Xod El Îsa, diyar kir ku ger rêz li maf û azadiyên jinan were girtin, dê Sûriye bibe welatekî ji bo her kesî bi ewle.
Seroka Desteya Jinan a Rêveberiya Xweseriya Demokratîk a Herêma Bakur û Rojhilatê Sûriyeyê Edalet Umer, jî axivî û li dijî tundiyê banga mezinkirina têkoşînê kir.
Çalakî bi berzkirina dirûşmên “Na ji tundiya li dijî jinan re” û “Jin, Jiyan, Azadî” bi dawî bû.
HESEKÊ
Li bajarê Hesekê jî bi pêşengiya Kongra Star meşeke girseyî bi dirûşma “Em bi hev re li dijî tundiyê civakeke demokratîk û komînal ava bikin” hat lidar xistin.
Bi sedan jinên ji Hesekê, Dirbêsiyê, Til Temir, Hol, Şedadê, Mergeda, koçberên kampên Serêkaniyê û Waşûkanî û koçberên ji bajarên Efrînê beşdarî meşê bûn.
Meşê li Çerxerêya Merşo ya taxa Til Hecer ber bi Qada Aştiyê ve dest pê kir. Di meşê de dirûşmên şermezarkirina tundiya li ser jinan hatin berzkirin û pankartên “Na ji tundiyê re”, “Erê ji jiyanê re”, “Dûrxistina jinan ji qada siyasetê bi xwe tundî ye” û “Jiyana komînal nimûneya bidawîkirina tundiyê ye” hatin vekirin.
Meş li Qada Aştiyê rawestiya û deqeyekê rêz hat girtin. Li vir endama Koordînasyona Kongra Star Gulîstan Gulo, tevahî jinên têkoşer silav kir û got: “Hîna li pêşiya me têkoşîneke dirêj heye.”
Gulistan Gulo, bal kişand ser zêdebûna tundiya li dijî jinên Sûriyeyî û got: “Li Sûriyeyê ji dema ku HTŞ’ê bû desthilat tundiya li ser jinan zêdetir bûye. Me hêvî dikir ku hêviyên me bi cih werin, lê em têghiştin em li pêşberî siyaseteke li dijî mafên jinan e.”
Gulistan Gulo, bal kişand ser ezmûna li Bakur û Rojhilatê Sûriyeyê hatî bidest xistin û wiha pê de çû: “Em li Bakur û Rojhilatê Sûriyeyê pêşeng in. Ev jî bi saya Rêber Abdullah Ocalan pêk hatiye ku rê li pêşiya me vekiriye. Em dev ji vê rêyê bernadin. Em ê qebûl nekin ku careke din mafên me werin çewisandin.”
Hevseroka Meclîsa PYD’ê ya bajarê Hesekê Zehra Elî, jî anî ziman ku tundiya li dijî jinan sûcek li dijî jinan û mirovahiyê ye. Zehra Elî got ku divê hesab ji kesên bêrêziyê li rûmeta jinan û rola wan di civakê de dikin, bê pirsîn.
Çalakî bi berzkirina dirûşmên “Jin Jiyan, Azadî” bi dawî bû.
