Nûnerê Weqfa Lêkolîn, Perwerde, Çand a Ekopolîtîk (EKEAV) Tarik Çelenk li civîna 12’emîn a Komîsyona Demokrasî, Xwişk-Biratî û Piştevaniya Mîllî axivî û anî ziman ku pirsgirêka Kurd ne tenê pirsgirêka navxweyî ya Tirkiyeyê ye, di heman demê de divê di çarçoveya Rojhilata Navîn de bê nirxandin.
Çelenk got, “Bûyerên li Kobanê û Hewlêrê bandoreke yekser li paşeroja navxweyî û derve ya Tirkiyeyê dikin.”
Çelenk destnîşan kir ku têgehên ‘Neteweya demokratîk, entegrasyona konfederal û KCK’ ên Rêber Apo dikarin tevkariyê li aştiyê bikin û destnîşan kir ku divê aliyên kurd û Tirk paradîgmayên hevpar hilberînin.
Çelenk got, “Li gel têgehên Ocalan divê têgehên hevpar ên Tirk û Kurd bêne afirandin ku cihêkar nebin, xizmetê ji aştiyê re bikin. Ev valahî divê bi karekî cuda bê dagirtin.”
Çelenk ragihand ku Tirkiye bi çareserkirina pirsgirêkên xwe yên navxweyî re ji bo gelên xizm ên li derve jî siyaseta hêza nerm a tevgir bimeşîne û diyar kir ku ev nêzîkatî ji bo ewlehiya Tirkmenan jî girîng e. Çelenk destnîşan kir ku rabirdûya demokratîk a Tirkiyeyê ji bo gelên Rojhilata Navîn dikare bibe ‘deriyekî rizgariyê’.
Çelenk bal kişand ser dersên ku ji pêvajoyên dîrokî bêne wergirtin û destnîşan kir ku reform û qutbûna aîdiyetê ji aliyê fêhmkirina pêvajoya aştiyê ve girîng e.
Çelenk rexne kir ku di gotinên polîtîk ên rojane de li şûna gotina ‘Pirsgirêka Kurd’ an jî ‘demokrasiyê’, nêzîkatiya ‘Tirkiyeya bê teror’ derdikeve pêş û hişyarî da ku ev yek li şûna çareseriyê dikare pirsgirêkê bicemidîne.
Ji bo çareseriyê jî Çelenk xwest, ku civaka sivîl hîn bêhtir tevlî pêvajoyê bê kirin, têkiliya aîdiyetê bê xurtkirin, têkiliyên çandî bêne xurtkirin û got, “Divê civaka sivîl tevlî pêvajoyê bê kirin, qadên deşarjê yên hestewarî bêne afirandin, bi Kurdên xizm ên li Îran, Iraq û Sûriyeyê re têkiliyên çandî bêne danîn, çîrokên hevpar di weşanan de bêne parvekirin. Li gel têgehên ku Ocalan destnîşan kir divê têgehên hevpar ên Tirk-Kurd bêne afirandin ku xizmetê ji aştiyê re bikin. Sînorên cografî divê bêne rakirin. Gavên weke seferên balafiran ên Amed-Erzîrom, Amed-Silêmaniye bêne avêtin.”
