DEM Partiyê ragihand ku ew ê bi namzetên xwe bikeve hilbijartinên herêmî ya 31’ê Adara 2024’an. Di hilbijartinên herêmî de yek ji bajarên ku herî zêde tê nîqaşkirin Stenbol e. DEM Partî ku li Stenbolê xwedî roleke sereke ye, ragihand ku ew ê bi namzetên xwe bikeve hilbijartinê. DEM Partiyê ji bo Şaredariya Bajarê Mezin a Stenbolê Meral Daniş Beştaş û Mûrat Çepnî weke namzet nîşan dan.
Yek ji namzetan Mûrat Çepnî ku weke endamê MYK’ê ya Partiya Sosyalîst a Bindestan û parlamenterê berê yê Îzmîrê yê HDP’ê tê naskirin, têkildarî fikrên xwe yên ji bo Stenbolê û çima li Stenbolê namzet derxistin, ji ANF’ê re axivî.
‘DEM PARTÎ NAVNÎŞANA ÇARESERIYÊ YA GEL E’
Çepnî diyar kir ku DEM partî navnîşana çareseriyê ya pirsgirêka Kurd, bindestan, Elewiyan, karkeran, jinan û ciwanan e û wiha got: “Hemû partiyên din ên bûrjûvayê ji çareser nekirina pirsgirêkan tîmar dibin, yan jî bendewariyên çareseriya pirsgirêkan mijûl dikin. Rewş bi vî rengî be, normal e ku DEM Partî li her qada ku lê ye siyasetê bike û di hilbijartinan de jî namzetên xwe derxîne. Ya nenormal, berevajî wê ye. Eger ne derxîne jî, divê mirov bipirse, ‘çima’.”
Çepnî ragihand ku sîstema sermayeyê armanc dike ku siyaseteke du partiyî-du blokî bike sazî û got: “Ev yek armanc dike ku bindest weke siyasî nederkevin pêş. Yanî êrîşeke tasfiyeyê ya dem dirêj e. DEM Partî li her dera pêkan, bi namzetên xwe ji vê perspektîfê namzet derdixîne û wê derxîne.”
‘EM Ê XEBATÊN XWE BI GEL RE BIMEŞÎNIN’
Çepnî anî ziman ku wê tifaqên demokratîk neyên redkirin û wiha got: “DEM Partî ne kombûneke dengan e, ne partiya hilbijartinê ye, DEM partî tevgereke azadiyê ye. Em tevgerek a gel in. Ji xwe ger ne wisa be, ne pêkan e ku encamên hilbijartinê pêk bên. Xebatên me yên hilbijartinê wê di gelek astan de bidome. Hem wê asta siyaseta giştî, hem jî asta siyaseta herêmî be. Hîn rasttir em ê rêveberiyên herêmî bi siyaseta giştî re binirxînin. Ji ber ku li Tirkiyeyê rêveberiyên herêmî ji navenda Enqereyê ne. Înîsiyatîfa herêmî hatiye tengkirin. Em ê xebatên xwe bi gel re bimeşînin. Têkildarî rêveberiyên herêmî, partiya me xwedî ezmûnên girîng e. Derbeya qeyûm jî ji bo şikandina vê ezmûnê ye. Em ê bernameya xwe ya ekolojîk, demokratîk, alîgirê ked û şaredartiya gel bînin ziman.”
