Di Îlona sala 2014’an de çeteyên DAÎŞ’ê bi fermana dewleta re Tirk li hember bajarê qedîm ê Kurdan dest bi êrîşan kir. Li hember wan êrîşan bi mehan jin û ciwanên Kurd ketin nav berxwedaneke mezin. Êrîş di 26’ê Çileya 2015’an de hatin şikandin û berxwedan bi rizgarkirina Kobanê bi encam bû. Cesûr Koçer ê di berxwedana Kobanê de biîndar bû û gaziyê şer e, di têkildarî mijarê de nêrînên xwe anî ziman.
Cesûr Koçer di destpêka axaftina xwe de 11’emîn salvegera rizgarkirina Kobanê li gelê Kurd, malbatên şehîdan, şervanên azadiyê û gaziyên şer pîroz kir û got, “Berxwedana li Kobanê berxwedana hêviya derketina ji bin ewrên tarî yên hişmendiya paşverû bû. DAÎŞ xwedî zîhniyeteke herî tarî ya cîhanê ye. Bi fermana dewleta Tirk û hinek hêzên din êrîşî Kobanê kir. Sedemên van êrîşan diyar in. Wan dixwest di şexsê Kobanê de hêviyên azadiyê yên gelê Kurd têk bibin. Lê di encama berxwedana mezin de me ew çeteyên hov şikandin.”
Gaziyê şer Cesûr diyar kir ku bi saya têkoşîna bi rûmet a bi sedan şehîdan Kobanê rizgar bû û wiha domand, “Ez tevahî hevrêyên xwe yên şehîd ên di vê berxwedana pîroz de şehîd bûn bi rêzdarî bi bîr tînim. Em deyndarên şehîdên xwe ne. Em ê hemûyan di berxwedan û têkoşîna xwe de her tim bidin jiyandin.”
Cesûr Koçer têkildarî êrîşên ji serê salê ve li hember Bakur û Rojhilatê Sûriyeyê û Rojavayê Kurdistanê didomin jî ev tişt anî ziman, “Li hember herêmên me di encama plan û peymanên qirêj de êrîşên pir hovane tên kirin. Çeteyên HTŞ’ê, DAÎŞ û yên girêdayî dewleta Tirk ji bo şoreşa me ya di encama berdêlên mezin de ava bûye hilweşînin êrîşên xwe didomînin. Ji ber êrîşan Kobanê di bin dorpêçeke mezin de ye. Ew çeteyên hov dixwazin heyfa xwe ya berî niha bi 11 salan rakin. Lê em jî ji wan re dibêjin ku wê çawa 2015’an winda kir, hûn ê vê carê bi awayekî hîn xerabtir winda bikin. Me çawa berî niha bi 11 salan DAÎŞ’ê ku bibû bela serê cîhanê têk bir, em ê niha jî wan çeteyên êrîşî xaka me dikin bi ruhê berxwedana Kobanê têk bibin û wan êrîşên hovane têk bibin.”
Gaziyê şer Cesûr Koçer di dawiya axaftina xwe de jî ev bang kir, “Em weke hevalên gazî îro jî di nav vê berxwedana pîroz de cih digirin. Bila gumana kesî nebe, eger planên wan êrîşkaran ên qirêj hebin, yê me jî berxwedana me ya ji çiyayan û bayê deştan xwe xwedî dike heye. Em ê wan êrîşan jî bişkênin. Dawiya DAÎŞ’ê çawa bû wê yên îro êrîşî me dikin jî wiha be. Em bang li tevahî gelê xwe, jin û ciwanên xwedî rûmet dikin ku werin tevlî berxwedan Rojava bibin. Bi yekîtî û hevgirtinê em ê bi ser bikevin.”
