Partiya Wekhevî û Demokrasiyê ya Gelan (DEM Partî) ya Stenbolê bi boneya 14’emîn salvegera Komkujiya Roboskî li ber avahiya navçeya Sarigaziyê daxuyanî da. Hevseroka Giştî ya Partiya Herêmên Demokratîk (DBP) Çîgdem Kiliçgun Ûçar, Hevseroka DEM Partiyê ya Stenbolê Arîfe Çinar, rêveberên navçeyan û gelek kes beşdarî daxuyaniyê bûn. Di daxuyaniyê de pankarta “Me Roboskî ji bîr nekiriye, em ê Roboskî ji bîr nekin” hat hilgirtin û dirûşmeyên “Roboskî ji bîr nekin, bila neyê jibîrkirin”, “Divê mafê hêviyê were bicîhanîn” û “Bê Serok jiyan nabe” hatin berzkirin.
Hevseroka DEM Partiyê ya Stenbolê Arîfe Çinar, ewilî axivî û diyar kir ku dîroka Tirkiyeyê bi komkujiyan tijî ye. Arîfe Çinar anî ziman ku ji Dersimê bigire heta Zîlanê bi gelek komkujiyan re hevrû nebûye û edalet nehatiye bicihanîn. Arîfe Çinar xwest ku dewlet bi hemû komkujiyan re hevrû were.
Piştre Hevseroka Giştî ya DBP’ê Çîgdem Kiliçgun Ûçar axivî û diyar kir ku banga Rêber Apo ya 27’ê Sibatê deriyê serdemeke nû li Tirkiyeyê veki û got, “Banga me ji bo kesên ku li dijî pêvajoyek aştiyê ne. Ji bo sedsala nû ya vî welatî bi wekhevî, azadî û demokrasiyê ava bibe, em di qonaxek krîtîk de ne.”
Çîgdem Kiliçgun Ûçar diyar kir ku jin, ciwan û kedkar bi bê paşeroj re rû bi rû hatine hiştin û got ku divê piştgiriya têkoşîna gelê Kurd a azadiyê were kirin. Çîgdem Kiliçgun Ûçar diyar kir ku divê Rêber Apo di tecrîdê de neyê girtin û anî ziman ku pêkanîna mafê hêviyêji bo Tirkiyeyê tê wateya ji nû ve avakirina aştî û wekheviyê.
‘VÎNA GELÊ KURD BIRÊZ OCALAN BI TENÊ NEHIŞT’
Çîgdem Kiliçgun Ûçar diyar kir ku tevî hemû polîtîkayên zilm û înkarê jî, gelê Kurd dev ji xwedîderketina ramanên Rêber Apo berneda û got, “Di demeke de ku tevahiya cîhanê birêz Ocalan wekî muxatab dibîne de em dipirsin; çima birêz Ocalan hîn jî di Girtîgeha Îmraliyê de ye? Vîna gelê Kurd birêz Ocalan bi tenê nehişt. Vîna gelê Kurd hêviya aştiyê şli vî welatî li ser piyan hişt. Em xwedî li hevjiyana azad a hemû gelan derdikevin.” Çîgdem Kiliçgun Ûçar her kesî vexwend mitînga 4’ê Çileyê ya ku li Qada Îstasyonê ya Amed were lidarxistin û got ku ew ê azadiya Rêber Apo û bicîhanîna mafê wî yê hêviyê biqîrin.
‘ME ROBOSKÎ JI BÎR NAKIRIYE’
Çîgdem Kiliçgun Ûçar li ser Komkujiya Roboskî axivî û got, “Me Roboskî ji bîr nekiriye. Êşa malbatan êşa me ye.”
Endama Meclîsa Jinan a DEM Partiyê ya Stenbolê Şengul Bîngol daxuyanî xwend. Şengul Bîngol diyar kir ku 14 sal di ser Komkujiya Roboskî re derbas bûne û hîn jî sûcdar nehatine darizandin. Şengul Bîngol got ku bêcezatî polîtîkayeke sîstematîk a dewletê ye.
Şengul Bîngol gotina Rêber Apo ya ku digot “Aştiya rastîn û mayînde tenê bi hevrûbûna heqîqetê re û avakirina edaletê pêkan e” bi bîr xist û got, “Bêyî hevrûbûna komkujiyên mîna Roboskî, sûcên giran ên ku ji hêla dewletê ve hatine kirin dernekevin holê û pergala bêcezatiyê neyê hilweşandin, behsa çareseriyeke demokratîk nayê kirin. Di çarçoveya banga birêz Abdullah Ocalan a aştî û civaka demokratîk de divê polîtîkayên înkar û şer werin terikandin û pêvajoyek aştiyê ya li ser bingeha wekheviya gelan were destpêkirin.”
Daxuyanî bi berzkirina dirûşmeyan bi dawî bû.
