Nûnertiya ÎHD’ê ya Îdirê ji bo balê bikişîne ser rewşa girtiyê nexweşê giran Emîn Aladag ê ku 26 sal in girtî ye û li Girtîgeha Ewlehiya Bilind a Hejmar 1 a Xarpêtê tê girtin, daxuyanî da. Nûnera ÎHD’ê ya Îdirê parêzer Şaziye Cantepe diyar kir ku pirsgirêkên sereke yên li girtîgehên li tevahiya Tirkiyeyê tên jiyîn tecrîd û pirsgirêkên tenduristiyê yên girtiyên nexweş in.
‘NEXWEŞIYA EMÎN ALADAG HER KU DIÇE GIRAN DIBE’
Şaziye Cantepe anî ziman ku bi hezaran girtî li benda dermankirinê ne û got, “Yek ji girtiyên nexweş Emîn Aladag ê ku di sala 1993’an de hat binçavkirine. Ji ber êşkenceya ku di girtîgehê de dît, lîfên destê rastê û lingê wî yê çepê qetiyan. Di sala 1998’an de tehliye bû û ji ber cezayê wî yê muebetê hat erêkirin hat girtin. Aladag ev 26 sal in di girtîgehê de ye. Ji ber emeliyatên wî dereng hatin kirin û nehat dermankirin, nexweşiya wî giran bû. Serlêdanên parêzeran ji bo berdana Aladag hemû hatin redkirin. Aladag bi gopal digere û bi alîkariya hevalên xwe pêwîstiyên xwe bi cih tîne. Ji bo taloqkirina cezayê Aladag serlêdan hate kirin û kar û barên wî li Nexweşxaneya Zanîngeha Firatê ya Xarpêtê didomin. Piştî kar û barên wî bi dawî bibe wê derkeve pêşberî şandeya tenduristiyê. Ji ber nexweşiyên ku bandorê li rewşa jiyana wî dike divê demildest serbest were berdan.”
‘BILA CEZAYÊ WÎ BÊ TALOQKIRIN’
Kekê Emîn Aladag, Bekir Aladag jî ev tişt anî ziman: “Nexweşiyên birayê min pir giran in. Di Tebaxa 2024’an de felc derbas kir û niha aliyê wî rastê qismî felc bûye. Rapora wî ya ji sedî 87 astengdar e heye. Rewşa wî girantir dibe û bi alîkariya hevalên xwe pêwîstiyên xwe bi cih tîne. Ji bo tedawiya wî li derve bidome divê ya cezayê wî yên mayî were taloqkirin an jî were efûkirin.”
